கம்பளத்தாரின் தேவராட்டம்

தேவராட்டம்:-

தேவராட்டம் 

சிவன், பார்வதி திருமணத்தில் தேவர்கள் ஆடிய ஆட்டம் தேவராட்டம் என பெயர் பெற்றதாக கூறுவர். தேவராட்டம் இராஜகம்பளத்து நாயக்கர் மக்களால் ஆடப்பட்டு வருகின்ற ஒரு பண்பாட்டு கலையாக உள்ளது. இவ்வாட்டம் தென் தமிழகத்தில் வாழ்ந்து வரும் நாயக்கரின மக்களின் வாழ்வோடு ஒன்றிணைந்த ஒரு கலையாக இன்றும் விளங்கி வருகிறது.





தேவதுந்துமி:-

உறுமி மேளம்

ஆகுளி, சிறுமுகை என்பது இதயம் அதிர்வான கும், கூஉஉம் என இரட்டிப்பு ஒலி தரும் உறுமிமேளம் ஆகும். கம்பளத்து நாயக்கர்களையும் தேவராட்டத்தையும் பிரித்துப்பார்க்க முடியாது அதுபோல் தான் தேவராட்டமும், தேவதுந்துமியும். தேவதுந்துமியின் இசைப்பு முறைக்கு ஏற்ப தேவராட்டம் ஆடப்படுகின்றன. தேவதுந்துமியை மக்கள் வழக்கில் உறும, உறுமை, உறுமி கொட்லு, கோமாளி கொட்லு, பூம்பூம் மாடு வாத்தியம் மற்றும் பெருமாள் மாடு வாத்தியம் என்று பல்வேறு பெயர்களில் தேவதுந்துமி அழைக்கப்படுகிறது.




துந்துமி என்பது பொதுநிலையில் தாள கருவியை குறிக்கும் சொல்லாகும். பேரிகை தேவலோகப் பறை எனறும் கூறப்படுகின்றது. சிவனின் வாகனமான நந்தி இசைக்கும் முழவு மத்தளம் என்றும் துந்துமி கூறப்படுகிறது. ஆளவந்தார் துந்துமி என்பது கூம்பு வடிவிலான தோற்றக் கருவி மாமரத்தால் செய்யப்பட்டது. கோனா என்ற கருவியால் தாக்கி ஒலிக்கப்படுவது. உரத்த ஒலியை கொடுக்கும் இந்த துந்துமியை இயக்குவோர் தண்டுபவை அகதி என அழைக்கப்படுகின்றனர். பூமி துந்துமி, அறங்க துந்துமி, மகாதுந்துமி ஆகிய பெயர்களால் அது குறிப்பிடப்படுகிறது. பூமி துந்துமியே இசைக்கருவிகளில் மிக பழமையானதாகக் கருதப்படுகிறது.




தேவதுந்துமியை இசைப்பதற்கென்று ஒரு பிரிவினர் கம்பளத்து நாயக்கரில் இருந்துள்ளனர். அவர்களை பண்டாரம் என அழைத்துள்ளனர். ஆனால் தற்போது பண்டாரம் பிரிவினர் தான் வாசிக்க வேண்டும் என்பதற்கில்லை. ஜமீன்கோடாங்கி பட்டியில் இருக்கும் சில்லவார்கள் பிரிவினர்களில் பலர் தேவதந்துமியை இசைத்து வருகின்றனர். உறுமியை இசைக்கக் கூடிய பிரிவினர்கள் திருவிழா, திருமண நிகழ்வுகள், பயிற்ச்சி பட்டறை மற்றும் சடங்குகளில் இன்றும் வாசித்து வருகின்றனரர்.





ஆட்ட அடவுகள்:-



தேவராட்டத்தில் மொத்தம் பதினெட்டு அடவுகள் உள்ளன. இந்த பதினெட்டும் நான்கு நான்காக விரிவடைந்து 72 அடவுகளாக உள்ளன. உறுமி வணக்கம், சபை வணக்கம், பூமிதேவி வணக்கம், மஞ்சப்பொடி இடித்தல், மஞ்சப்பொடி சலித்தல் என்று அடவுகளுக்கு செயல்களால் பெயர் சுட்டப்படுகின்றன. சான்றாக ஆட்டக் கலைஞர்கள் முதலில் மேடையில் ஆட வரும் பொழுது உறுமியை வணங்கி அதாவது இருகைகளாலும் தொட்டு வணங்கி வருவர். ஒரு வேலை முதலில் உறுமியை வணங்க முடியவில்லை என்றால் சபையில் ஆடி வரும் பொழுது வணங்கிக் கொள்வர்.




          டட்டப்பூ டீடப் டட்டப்பூ டீடப்
          டட்டப்பூ டீடப் டட்டப்பூ டீடப்

என்ற அடவில் வணக்கத்துடன் மேடையில் வலம் வருவர். அதன் பிறகு

          டீட்ட கீட்ட டகுட கீட்ட
          டீட்ட கீட்ட டகுட கீட்ட

இவ்வடவு பூமாதேவி அடவாகும். இவ்வடவில் பூமாதேவியான நிலத்தை தொட்டு வணங்கி ஆடுவர்.

         டிடீ டிடீ டிடீடக் டீட்டகுடகு டீடக்
         டிடீ டிடீ டிடீடக் டீட்டகுடகு டீடக்

         டட்டகுடகு டட்டகுடகு டட்டகுடகு டீடக்
         டட்டகுடகு டட்டகுடகு டட்டகுடகு டீடக்

டகுகுட டகு டிகுகுட டகு டட்டீ டட்டக்கு டீடக்
டகுகுட டகு டிகுகுட டகு டட்டீ டட்டக்கு டீடக்

           டட்டப்பூ டட்டப்பூ டட்டப்பூ டட்டப்பூ
           டட்டப்பூ டட்டப்பூ டட்டப்பூ டட்டப்பூ

                  டீடீ டட்டப் பூ டீடீ டட்டப் பூ
                  டீடீ டட்டப் பூ டீடீ டட்டப் பூ

என்று அடவுகள் நீண்டு செல்கின்றன.





ஆட்டக் கலைஞர்கள்:-



ஜமீன் கோடாங்கிபட்டியில் தேவராட்டம் ஆடுவதில் ஆண், பெண் என்ற பாகுபாடு இருப்பதில்லை. அவ்வூரில் உள்ள பெண்கள் ஆண்களுக்கு இணையாக தேவராட்டம் ஆடுகின்றனர். திருவிழா நேரத்தில் அவ்வூர் பொது மைதானத்தில்  ஆண்கள், பெண்கள், சிறுவர்கள் என்று அனைவரும் ஆடுகின்றனர். இவ்வூரில் பிறந் து ஜந்து வயதில் இருந்து தேவராட்டம் ஆடக் கற்றுக்கொள்கின்றனர். சக்கதேவி கலைக்குழு மூலமாக ஆடற்கலைஞர்கள் ஒன்றிணைந்து பல்வேறு ஊர்கள் மட்டுமின்றி பிற மாநிலங்களிலும் தேவராட்டத்தை நிகழ்த்தி வருகின்றனர். குழுவின் மூலமாக தேவராட்டத்தை முதன்முதலாக (தமிழ் பல்கலைக் கழகம்) வெளியிடத்திற்கு எடுத்துச் சென்றவர் மறைந்த கலைஞர் கலைமாமணி குமாரராமன் ஆவார். தஞ்சைக்கு எடுத்துச் செல்வதற்கு முன் ஊர் பெரியவர்கள் முன்னிலையிலும், குல தெய்வத்தின் முன்னிலையிலும் சம்மதம் வாங்கிய பின்பே தேவராட்டத்தை தமிழ் பல்கலைக் கழகத்தில் முதன் முறையாக நிகழ்த்தியுள்ளனர்.





தேவராட்ட ஒப்பணைகள்:-

ஒப்பணையற்ற தேவராட்டம் 

தேவராட்டம் ஆடும் இருபாலரும் பெருபாண்மையான ஒப்பணைகளை செய்வதில்லை. ஆண்கள் அறையில் ஒரு வேட்டியும், ஜிப்பாவும், இடுப்பில் ஒரு துணியும் கட்டியிருப்பர். தேவராட்டத்தை வெளியிடங்களுக்கு கொண்டு செல்வதற்கு  இவ்வுடை நாயக்கர் மக்களிடையே பயன்பாட்டிற்கு வருவதற்கு முன்பு ஆண்கள் இடுப்பில் வேட்டி மட்டுமே கட்டி ஆடியிருக்கின்றனர்..... நெற்றியில் செந்தூரம் மற்றும் திருநீரால் நாமம் இட்டு காலில் சலங்கை கட்டியிருப்பர். பெண்கள் ஆடம்பரமில்லாத சேவையை பின்கொசுவம் வைத்து கட்டியிருப்பர். தலைப்பின்னலைப் பொருத்தவரை எப்போதும் போல சாதரணமாக பின்னிக் கொள்கின்றனர். இவர்களும் காலில் சலங்கை கட்டியிருப்பர். இருபாவரும் கையில் துணி வைத்திருப்பர். சலங்கையில் இத்தனை சலங்கைதான் கட்டியிருக்கவேண்டும் என்ற கணக்கில்லை. கையில் வைத்திருக்கும் துணியின் நிறத்திலும் ஒழுங்கில்லை. மற்றபடி அனைத்தும் முறையாகவே செய்கிறார்கள்.





ஆடப்படும் சூழல்கள்:-



தேவராட்டம் நாயக்கர் சமுகத்தில் பிறப்பு முதல் இறப்பு வரை ஆடப்படும் ஒரு கலையாகும். நாயக்கர் சமுகத்தில் நடைபெறக்கூடிய திருமணம், சடங்குகள், ஜக்கம்மாள் வழிபாடு போன்றவற்றில் தேவராட்டம் மற்றும் உறுமி இன்றி நடைப்பெருவதில்லை. பூப்பெய்திய பெண்ணை ஊருக்கு வெளியில் ஒரு குடிசை அமைத்து அதில் தங்கவைப்பர். தீட்டு கழிந்த பதினாறாம் நாள் அவள் தேவதுந்துமி இசை மற்றும்  தேவராட்டத்துடன் ஊருக்குள் அழைத்து வரப்படுகிறாள். அதுப்போன்று திருமணத்தில் இரு குடிசைகள் அமைத்து மணமக்கள் தனித்தனியாக குடிசையில் இருக்கும் போது மந்திரம் கூறி சடங்குகள் நிறைவேறிய பின்பு தேவதுந்துமி இசை முழங்க மணமகன் மணமகள் கழுத்தில் மங்கள நாண் பூட்டுவர். அதன்பிறகு மணமக்களுக்குரிய சடங்குகள் நடைபெறுகன்றன. திருமணத்தின் பொழுது ஒலிக்கப்படம்  தேவதுந்துமி இசைக்கு ஆண்களும் பெண்களும் இணைந்து தேவராட்டம் ஆடப்படுகின்றனர்.




இறப்பின் பொழுது பெரும்பாலும் தேவராட்டம் ஆடப்படுவதில்லை. பால் தெளித்தல், கல்நடுதல் (நடுகல்) நிகழ்ச்சியில் தேவராட்டம் இசை முழங்க ஆடப்படுகின்றன. கலைமாமணி குமாரராமன் இறந்த பொழுது சிறுவர் முதல் பெரியவர்கள் வரை தேவராட்டம், ஒயில், சிலம்பம் போன்ற கலைகளை நிகழ்த்தினர். பெரும்பாலும் இறப்பின் பொழுது தேவராட்டம் ஆடப்படுவதில்லை. கலைமாமணி குமாரராமன் எங்களுடைய குரு அவார். குருவிற்கு  காணிக்கை செலுத்தும் செலுத்தும் விதமாகவும், அவரை சிறப்பு படுத்தும் விதமாகவுமே நாங்கள் ஆடினோம் என்று கோடாங்கிபட்டி மக்கள் கூறுகின்றனர்.





முடிவுரை:-



தேவராட்டம்  இனம் சார்ந்த ஆட்டக்கலையாக இன்றும் கம்பளத்து நாயக்கர் மக்களிடையே ஆடப்பட்டு வருகின்றன. கம்பளத்து நாயக்கர்களின் சமுதாய ஆட்டமாக ஆடப்பட்டு வந்த இக்கலை இன்று தமிழ்நாட்டு கிராமக் கலைகளில் ஒன்றாக விளங்குகி வருகின்றன.





குறிப்பு:- 



தேவராட்டம் என்னும் கலை தென் தமிழக கொல்லவார்களிடம் மட்டுமே பிரபலமானதாக இருக்கின்றது. வட தமிழக கொல்லவார்கள் தேவராட்டம் ஆடுவதில்லை என்பது கவனிக்கத்தக்கது.