🔅 கொல்லவார் 🔅 [గొల్ల|GOLLA|ಗೊಲ್ಲ] [యాదవులు - ಯಾದವರು]

கொல்ல, எர்ர கொல்ல, பாகநாட்டி கொல்ல, குறும கொல்ல,தோக்கல கொல்ல, காடு கொல்ல, நல்ல கொல்ல,பூஜ கொல்ல, கிருஷ்ண கொல்ல, வடவர் , அஸ்தாந்திர கொல்ல, தூமாட்டி கொல்ல, வடுக ஆயர் போன்ற பல உட்பிரிவுகளை உள்ளடக்கியது கொல்லவார் குலம். ஆந்திரா, தெலங்கானா, கர்நாடகா, மகாராஷ்டிரா,ஒரிசா, தமிழகம் ஆகிய மாநிலங்களில் பரவி வாழும் யாதவர்கள் (YADAVAS). பெரும் பேரரசுகளை ஆண்ட பேரரசர்களாகவும், தெலுங்கு, தமிழ், கன்னட பாளையங்களின் பாளையக்காரர்களாகவும் இருந்து தென்னாட்டின் மீது கோலோச்சி அரசாட்சி செலுத்திய சந்திரவம்ச க்ஷத்திரியர்கள்.

புதன், 3 ஜூன், 2020

வரதராஜுலு நாயுடு 133வது பிறந்தநாள்

வரதராஜலு நாயுடுவில் 133வது பிறந்தநாள் இன்று:-

வரதராஜலு நாயுடு

டாக்டர் வரதராஜுலு நாயுடு:-

தமிழ்நாடு காங்கிரஸ் கட்சியை ஆரம்ப காலத்தில் வளர்த்தது யார் என்று கேட்டால், நாயுடு, நாயக்கர், முதலியார் என்பார்கள். டாக்டர் வரதராஜுலு நாயுடு, பெரியார் ஈ.வெ.ராமசாமி நாயக்கர், திரு.வி.கல்யாணசுந்தர முதலியார் ஆகிய மூவரை இது குறிக்கும். 'நாயுடு, ராஜதந்திரத் தமிழைப் பயன்படுத்துவார். நான் பச்சைத் தமிழில் எழுதுவேன். திரு.வி.க. சங்கத் தமிழைப் பயன்படுத்துவார்’ என்று பெரியாரே ஒருமுறை சொன்னார். அத்தகைய சிறப்புப் பெற்ற மனிதர் டாக்டர் வரதராஜுலு நாயுடு.

டாக்டர் வரதராஜுலுவுக்கு 'தென்னாட்டுத் திலகர்’ என்று பட்டம் கொடுத்தவர் வ.உ.சி. இவரைத் 'தமிழ்ப் பெரியார்’ என்று கொண்டாடியவர் வ.ரா. 1952-ம் ஆண்டு ராஜாஜி, சென்னை மாகாணத்தின் முதலமைச்சராக ஆகும்போது, அந்தப் பொறுப்பு வரதராஜுலுவுக்கே போய்ச் சேரவேண்டும் என்று பரிந்துரைத்தவர் பெரியார்.
தமிழ்ச் சமூக வரலாற்றில் மிகப்பெரிய மாற்றத்தை ஏற்படுத்தியவை, 1920ல் நடந்த சேரன்மாதேவி குருகுலப் போராட்டமும், 1953-ல் நடந்த குலக் கல்வி எதிர்ப்பும். இரண்டிலும் வரதராஜுலு முன்னணி வகித்தார். காங்கிரஸில் இருந்துகொண்டே காங்கிரஸ் முதலமைச்சரை எதிர்க்கலாமா என்று நேரு நடவடிக்கை நோட்டீஸ் அனுப்பும் அளவுக்குத் தீவிரமாக இருந்தார்.

இந்த எதிர்ப்பைச் சமாளிக்க முடியாமல் ராஜாஜி பதவி விலகியபோது, காமராஜரை முதல்வராக முன்மொழிந்தவரும் வரதராஜுலு நாயுடு அவர்கள் தான். காமராஜரிடம் சிறந்த நட்பு பாராட்டிய வரதராஜலு நாயுடு அவருக்காக ஒருமுறை மகாத்மா காந்தியையே மன்னிப்பு கேட்க வைத்த நிகழ்வு காமராஜர் மீதான வராஜலுவின் நட்பும் காங்கிரஸில் அவருக்கு இருந்த பெரும் செல்வாக்கையும் நமக்கு உணர்த்தி கூறுவன. சில காலம் இந்து மகா சபை பக்கம் இருந்த நாயுடு அவர்கள் "எரிமலை அல்லது முதலாவது இந்திய விடுதலைப் போர்" என்ற வீரசாவர்கரின் புத்தகத்தை பிரிட்டிஷ் அரசு தடை செய்தபோது அதனை ரகசியமாக வெளியிட நிதி உதவி செய்தவர் .

தமிழகத்தின் முன்னோடிப் பத்திரிகை ஆசிரியராகவும் வரதராஜுலுவைக் குறிப்பிட வேண்டும். பிரபஞ்ச மித்ரனும் தமிழ்நாடும் அவர் நடத்திய தமிழ் இதழ்கள். 'இந்தியன் எக்ஸ்பிரஸ்’ என்ற ஆங்கில நாளிதழை 1932-ல் ஆரம்பித்ததும் இவரே. 'சமஸ்கிருதம் கலந்து எழுதும் அந்தக் காலத்தில் பழகு தமிழில் எழுதிவந்தவர்’ என்று இவரைப் பாராட்டினார் ஐயா ம.பொ.சி அவர்கள். 'தமிழ்நாடு’ பத்திரிகையின் அச்சுக் கூடத்தில் அச்சுத் தொழிலாளியாக தனது வாழ்க்கையைத் தொடங்கியவர் தனது தியாகத்தாலும், கூரிய அறிவாலும், கடும் உழைப்புப்பினாலும் வானளவு உயர்ந்தவர் வரதராஜுலு நாயுடு என்றால் அது மிகையல்ல.