மாமன்னர் திருமலை நாயக்கர் வம்சாவழி கைப்பீது

சிவகிரி ஏடு:-

அரசியார்களுடன் மன்னர் திருமலை நாயக்கர்

ஆவணம்:-  காகிதப் படி

தகவலர்:-  குண்ணாங் காட்டு . மணியகாரர் திரு. கே. கே. முத்துசாமிக் கவுண்டர்

இருப்பு:-  சிவகிரி-சின்னியம் பாளையம் புலவர் S.V. பழனிச்சாமிக் கவுண்டர் வசம் இருந்தது

படித்ததர்:-  புலவர் செ. இராசு

காலம்:-  ஆங்கிலேயர் சகாப்தம்

கைப்பீதில் உள்ளவை:- 

மதுரைச் சீமையை ஆண்ட கர்னாடக ராஜாக்களின் வரலாறு

சாலிவாகன சகாப்தம் 1482 இங்கிலிஸ் வருசம் 1559-60 தமிள் ரவுத்திரி வருசம் மார்களி மாதத்தில் கொட்டியம நாகமனா யக்கர் குமாரன் விசுவநாத நாயக்கர் அரசாட்சிக்கு வந்து ருத்து ரோத்காரி வருசம் மார்களி மாதம் வரை பட்டம் ஆண்டு 1563 வருசம் டிசம்பர் கத்திலிறந்து போனார்.

அப்பால் ௸யார் குமாரன் குமாரகிருஷ்ணப்ப நாயக்கர் ருத்துரோத்காரி வருசம் தைமாதம் முதல் ஆங்கிரஸ வருசம் தை மாத வரைக்கும் பட்டம் ஆண்டு 1573 வருசத்திலிறந்தார்.

அப்பால் ௸யார் மூத்த மகன் பெரிய வீரப்ப நாயக்கர் ஆங்கிரஸ வருசம் மாசி மாதம் முதல் மன்மத வருசம் கார்த்திகை வரைக்கும் ராஜரீகம் செயிது 1595 வருசத்திலிறந்து போனார்.

அப்பால் ௸ பெரிய வீரப்ப நாயக்கற்கு பின்பு நாயக்கராகிய குமாரர் கிருஷ்ணப்ப நாயக்கர்..யக்கனாகித விசுவநாத நாயக்கர் ரெண்டு பேரில் விசுவப்ப நாயக்கருக்குப் பட்டமும் லிங்கம நாயக்கருக்கு இளவரிசைப் பட்டமும் கட்டி ௸ விசுவப்ப நாயக்கர் ஜனவரி 1600 வருடத்தின், அப்பால் இள வரிசைப்பட்ட நாளில் லிங்கம நாயக்கர் சுபகிருது வருசம் வய்யாசி மாதம் மாள, 1602 ராஜரீகம் செய்து இறந்து போனார்

அப்பால் ௸ லிங்கம நாயக்கனாகிய குமாரகிருஷ்ணப்ப நாயக்கருடைய குமாரன் முத்துக்கிருஷ்ணப்ப நாயக்கருக்கு அவர் சிறிய தகப்பனான கஸ்தூரி ரெங்கப்ப நாயக்கர் சொல்ப்ப நாளும் அப்பால் ஷை முத்துக்கிருஷ்ணப்ப நாயக்கரும் றாஜரீகம் செயிது 1609ல் இறந்து போனார்

அப்பால் ௸ முத்துக் கிருஷ்ணப்ப நாயக்கருக்கு முத்துவீரப்ப நாயக்கர் திருமலை நாயக்கர் குமாரமுத்து நாயக்கர் யென்ற மக்களில் முத்து வீரப்ப நாயக்கர் 1609 வருஷத்தில் பட்டத்துக்கு வந்து 1622 வருசத்தில் இறந்து போனார்.

அப்பால் திருமலை நாயக்கர் பட்டத்துக்கு வந்து 1659 ஆம் வருசத்தில் இறந்து போனார்

அப்பால் பட்டத்துக்கு வந்த லக்க நாயக்கர் முத்து வீரப்ப நாயக்கர் மூணு மாசம் பட்டம் ஆண்டு இறந்து போனார்.

அப்பால் சொக்கநாத நாயக்கரான சொக்கப்ப நாயக்கர் பட்டத்துக்கு வந்து கொண்டிருக்கும்போதே 1677 வருசத்தில் அவர் சகோதரன் முத்தலி நாகம நாயக்கர் பட்டத்துக்கு வந்து ஆண்டவரை விலக்கி முந்திய சொக்கப்ப நாயக்கருக்கு பட்டங் கட்டி அவர் போனார் 1681 வருசம் வரை பட்டம் ஆண்டு இறந்து போனார்.

அப்பால் அவருடைய மூணு மாசத்திய குழந்தையான விஜயறெங்க சொக்கநாத நாயக்கருக்குப் பட்டங்கட்டி அவருக்குப் பிதாமகியும் ௸ றங்க கிருஷ்ணமுத்து வீரப்ப நாயக்கருக்குத் தாயாருமான மங்கம்மாள்.... யென்று பேர் விளங்கிய விஜய றெங்க சொக்கநாத நாயக்கன் பட்டத்துக்கு வந்து றாஜரீகம் செயிது 1731 வருசத்தில் சந்ததியின்றி யிறந்து போனார்.

உடனே ௸யார் சமுசாரமான மீநாக்ஷியம்மாள் பட்டத் துக்கு வந்து தன் சகோதரன் வெங்கிடப் பெருமாள் நாயக்கரை முன்னிட்டுக் கொண்டு பட்டமாண்டு விஜய குமார முத்துத் திருமலை என்பாரை ஸ்திரீகாரம் செயிதுகொண்டு அவர் பேருக்கு பட்டமாண்டதில் 1734 வருசத்தில் படெசா கலாபம் வந்து கர்நாடகம் எடுபட்டுப் போயி துலுக்காணமாயிவிட்டது.

கைபீதின் விளக்கம்:-

விஸ்வநாத நாயக்கர்

சாலிவாகன சகாப்தம் 1482 ஆங்கில வருடம் 1559-60 தமிழ் ரவுத்திரி வருடம் மார்கழி மாதத்தில் கொட்டியம் நாகம நாயக்கரின் குமாரன் விசுவநாத நாயக்கர் அரசாட்சிக்கு வந்து ருத்துரோத்காரி வருடம் (60 வருடக் கணக்கில் 57வது வருடம்) மார்கழி மாதம் வரை மதுரை அரசு ஆண்டார். பிறகு 1563ம் வருடம் டிசம்பர் மாதத்தில் மரணமடைந்தார்.

இதன்பிறகு அவரின் புதல்வன் குமாரகிருஷ்ணப்ப நாயக்கர் ருத்துரோத்காரி வருடம் தைமாதம் முதல் ஆங்கிரஸ வருடம் தை மாத வரைக்கும் ராஜ்ஜியம் ஆண்டு 1573ம் வருடத்தில் மரணமடைந்தார்.

இதன்பிறகு அன்னாரின் மூத்த மகன் பெரிய வீரப்ப நாயக்கர் ஆங்கிரஸ வருடம் மாசி மாதம் முதல் மன்மத வருடம் கார்த்திகை வரைக்கும் அரசாட்சி செய்து 1595ம் வருடத்தில் இறந்துப்போனார்.

பெரிய வீரப்ப நாயக்கருக்கு பின்பு அவருடைய இரண்டு மகன்களான இரண்டாம் கிருஷ்ணப்ப நாயக்கர் (லிங்கமநாயக்கர்) மற்றும் விசுவநாத நாயக்கர் (விசுவப்ப நாயக்கர்) ஆகிய இருவரில் விசுவப்ப நாயக்கருக்குப் மன்னராக முடிசூட்டப்பட்டார். மேலும் அவரது தம்பி லிங்கம நாயக்கருக்கு இளவரசர் பட்டம் கட்டப்பட்டார். விசுவப்ப நாயக்கர் இறந்து போனதன் விளைவாக, ஜனவரி 1600 வருடத்தின், அப்பால் இளவரசராகிய லிங்கம நாயக்கர் சுபகிருது வருடம் வைகாசி மாதம், 1602ம் ஆண்டு வரை ஆட்சி செய்துவிட்டு இறந்து போனார்.

இதன்பிறகு லிங்கம நாயக்கனாகிய குமாரகிருஷ்ணப்ப நாயக்கருடைய மகனான முத்துக்கிருஷ்ணப்ப நாயக்கரின் சித்தப்பா கஸ்தூரி ரெங்கப்ப நாயக்கர் சொற்ப நாட்கள் அரசாண்டார், அதன்பிறகு முத்துக்கிருஷ்ணப்ப நாயக்கர் ராஜ்ஜியம் ஆண்டு 1609ல் இறந்து போனார்.

பிறகு முத்துக் கிருஷ்ணப்ப நாயக்கருக்கு முத்துவீரப்ப நாயக்கர் திருமலை நாயக்கர் குமாரமுத்து நாயக்கர் ஆகிய மகன்கள் பிறந்தனர். அவர்களுள், முத்து வீரப்ப நாயக்கர் 1609 வருஷத்தில் அரியணை ஏறி 1622ம் வருடத்தில் இறந்துப் போனார்.

மதுரை நாயக்கர்களின் கொடிவழிகள்

பிறகு திருமலை நாயக்கர் பட்டத்துக்கு வந்து 1659 ஆம் வருடத்தில் இறந்து போனார்

அப்பால் பட்டத்துக்கு வந்த லக்க நாயக்கர் என்கின்ற முத்து வீரப்ப நாயக்கர் மூன்று மாதங்கள் அரசாண்டு பின் இறந்து போனார்.

இதன்பிறகு சொக்கநாத நாயக்கரான சொக்கப்ப நாயக்கர் பட்டத்துக்கு வந்து அரசாண்டுக்கொண்டிருக்கும்போதே 1677 வருசத்தில் அவர் சகோதரன் முத்தலி நாகம நாயக்கர் அரியணையை கைப்பற்றி சில காலம் ஆண்டுவந்தார். பின்னர் தனது அண்ணாகிய சொக்கப்ப நாயக்கருக்கே மீண்டும் அரசைக் கொடுத்து பட்டங் கட்டிவிட்டு அவர் விலகிக்கொண்டார். 1681 வருடம் வரை சொக்கநாத நாயக்கர் பட்டம் ஆண்டு பின்பு இறந்து போனார்.

ராணி மங்கம்மாள்

பின்னர் அவருடைய மகன்வழிப் பேரன் மூன்று மாதக் குழந்தையான விஜயரெங்க சொக்கநாத நாயக்கருக்குப் பட்டங்கட்டி அவருடை பாட்டியும் ரங்க கிருஷ்ணமுத்து வீரப்ப நாயக்கருக்குத் தாயாருமான மங்கம்மாள் அரசியாக மதுரையை ஆண்டார். பிறகு மங்கம்மாளின் பேரன் விஜயரங்க சொக்கநாத நாயக்கர் தன்னாட்சியுடன் அரசாண்டு 1731ம் வருடத்தில் சந்ததியின்றி இறந்து போனார்.

உடனடியாக விஜயரங்க சொக்கநாத நாயக்கரின் மனைவியான மீனாக்ஷியம்மாள் பட்டத்துக்கு வந்து தனது சகோதரன் வெங்கிடப் பெருமாள் நாயக்கரை உதவியாளராகக் கொண்டு அரியணை ஏறினார். விஜயகுமார முத்துத் திருமலை என்னும் குழந்தையை தத்தெடுத்து அக்குழந்தையின் காப்பாளராக மதுரை ராஜ்ஜியத்தை அரசாண்டார். 1734 வருடத்தில் நவாப்புடன் ஏற்பட்ட மோதலால் கர்நாடக ராஜ்ஜியம் வீழ்ந்து துலுக்கர்களின் அதிக்கத்திற்கு சென்றுவிட்டது.

குறிப்பு:-

* மேலே குறிப்பிடப்படும் கர்நாடக ராஜ்ஜியம் என்பதன் பொருள் தற்போதைய கருநாடக கன்னட ராஜ்ஜியம் என்பது அல்ல அது கீழே புவியியல் வரைப்படத்தில் சுட்டிக்காட்டப்பட்டுள்ள பகுதிகளை உள்ளடக்கிய நிலப்பரப்பை குறிக்கும் சொல்லாகும்.

கர்னாடக பகுதிகளை சுட்டும் வரைப்படம்

* அ.கி. பரந்தாமனார் தன்னுடைய "மதுரை நாயக்கர் வரலாறு" நூலில் குறிப்பிட்டுள்ள காலக் கணிப்பிற்கும், இக்கைபீதில் குறிப்பிடப்பட்டுள்ள காலக் கணிப்பிற்கும் இடையே உள்ள ஒரு பெரிய மாறுப்பாடு எதுவெனில் விசுவநாத நாயக்கரின் ஆட்சிக்கால வருடங்கள் மட்டுமே. 

காலக்கணிப்புகளுக்கு இடையே உள்ள வேறுப்பாடுகள்

ஆ.கி. பரந்தாமனார்  - விசுவநாத நாயக்கர் (1529 - 1564)

இக்கைபீதில்  - விசுவநாத நாயக்கர் (1559 - 1563)

இதைத் தவிர்த்த ஏனைய ஆட்சியாளர்களின் ஆட்சிக்கால வருடங்கள் அனைத்தும் ஏறக்குறைய பொருந்திப்போகிறது.