தாசரிபள்ளி பாளையப்பட்டு கைப்பீது - வெங்கடபதி நாயுடு வம்சம்

 

தாசரிபள்ளி பாளையம் கைப்பீது:-

அகோபிலம்-நல்லமலை தொடர்

தாசரிபள்ளி கைப்பீது

கைப்பீது தாசரிபள்ளி பாளையப்பட்டு வெங்கடபதி நாயுடு அவர்களால் பதியப்பட்டது.

தாசரிபள்ளியின் பூர்வ சரித்திரம்:-

கைப்பீது பக்கம் - 1

சாதவாகன சக வருடம் 1036 நாளில் ஜெய வருடத்தில் கருநாடக தேசத்தில் மண்டலத்தில் அகோபிலம் ஸ்ரீ நரசிங்கப் பெருமாள் திருக்கோவில் சுற்றி அடந்த வனப்பகுதிகளாக இருந்த காலத்தில் வடநாட்டில் இருந்த "மானுமுத்தி தாசர்கள்" என்பவர்கள் வடக்கில் பஞ்சம் நிலவி அங்குவாழ வழியில்லாத காரணத்தினால் தங்களின் வாரிசுகள் மற்றும் உறவினர்களுடன் குடிபெயர்ந்து வந்து மேற்சொன்ன சந்தன மரங்கள் நிறைந்திருந்த அகோபிலம் காட்டில் நரசிங்கப்பெருமாள் திருத்தலத்திற்கு எதிர்திசையில் இருந்த மலை ஒன்றில் குடிசைகளை அமைத்துக்கொண்டு அந்த காட்டில் இருந்த சந்தன மரங்களையும், பிற வளங்களையும் வெட்டி அவைகளை ஊருக்குள் சென்று விற்றுக்கொண்டும், காட்டில் வாழும் வனவிலங்குகளை வேட்டையாடியும் பிழைப்பு நடத்திவந்தார்கள். அப்போது, அக்காலக்கட்டத்தில் இப்பகுதிகளை உள்ளடக்கிய அரசை ஆண்டுவந்த அரசர் இவ்வனத்திற்கு வரும் சமயத்தில் இந்த தாசரிவாருகளின் குடிசைகளைக் கண்டு, இவ்விடம் ஒரு புண்ணியஸ்தலம் இங்கு வாழும் மக்கள் யாரும் வாழ்வில் துன்பமடையக்கூடாது என்று அவ்விடத்தை தாசரிகளுக்கே வழங்கி அகோபிலம் மலையடிவாரத்தில் வாழ்ந்துக்கொள்ள அனுமதி தந்தார். இவ்வாறாக இவ்விடம் தாசரிகள் வாழ்ந்த காரணத்தில் மக்களால் தாசரிபள்ளி என்று வழங்கப்படலானது.

கைப்பீது பக்கம் - 2

இவ்வாறு காலங்கள் கடந்து பின்பு விஜயநகரப்பேரரசை பௌடராய தேவமகாராயர் ஆண்டுக்கொண்டிருந்த போது ஒருநாள் ஸ்ரீ அகோபில நரசிங்கப்பெருமாளை தரிசித்துவிட்டு சூழ்ந்துள்ள வனப்பகுதியில் வேட்டைக்கு வரும்போது தாசரிபள்ளியைக் கண்டு தன்னுடன் வந்த முக்கியஸ்தர்களிடம் இந்த குடிசைகள் யாருடையது இங்கு இருப்பவர்கள் யார் என்றும் இவர்களின் வாழ்வாதாரம் என்னவென்றும் விசாரித்தபோது இம்மக்கள் வடதேசத்தில் இருந்து வந்த மானுமதி தாசரிகள். இவர்கள் பல காலமாக இங்கு சந்தன மரங்களை வெட்டி சுற்றியுள்ள கிராமங்களில் விற்று ஜீவனம் நடத்திவிருக்கிறார்கள் என தெவித்தனர்.

விவரங்களை கேட்டறிந்த ராயர், ஆணை ஒன்று பிறப்பித்தார் அதன்படி, தாசரிவாருகளை இங்குள்ள காடுகளை சீர்ப்படுத்தி கிராமங்களை உண்டாக்கும்படியும் அவ்வாறு உருவாக்கப்படும் கிராமங்கள் அவரவர்களுக்கே உரியது என்றும், அங்கு விளைநிலங்களை ஏற்படுத்தி அங்கு வரும் விளைச்சல்களில் வரும் வருவாயை 6 வருடங்களுக்கு தாசரிகளே அனுபவிக்கலாம் என்றும் அதன் பிறகு கிடைக்கும் வருவாய்களை வருடம் ஒன்றிற்கு கஜ வராகம் என்கிற முறையில் விஜயநகர அரசிற்கு வரியாக செலுத்தி வரவேண்டும் என்றும் உத்தரவு ஒன்றினை பிறப்பித்தார்.

அகோபிலம் நரசிங்கப்பெருமாள் திருக்கோவில்

17வருடங்களுக்கு பிறகு தாசரிபள்ளி நிலங்கள்யாவும் விளைநிலங்களானது, தாசரிகள் அரசிற்கு முறையாக 1120 வரகங்கள் வரிக்காணிக்கைகளாக செலுத்திவந்தார்கள். இதன்பிரகாரம் சாளுவ நரசிம்மராயர் விஜயநகரத்தை அண்டுவரும் காலத்திலும் வரி செலுத்தி வந்தார்கள்.

பிறகு கிருஷ்ணதேவமகாராயர் விஜயநகரத்தில் ராஜ்ஜிய பரிபாலனம் செய்த காலத்தில் அவரின் கீழ் பர்வதய்யதேவமகாராஜூ என்பவர் துவ்வூர் சீமையை சேர்ந்த தாசரிபள்ளியை நாயக்கதனமாக ஆண்டுவரும் சமயத்தில் அவரது ஆட்சிக்கு உட்பட்டு தாசரிபள்ளிக்கு தெற்கே உள்ள மலைமீது இருக்கும் வெங்கல நாதர் திருக்கோவிலுக்கு தானங்களை வழங்கி ஆலயம் முறையாக செயல்பட வழிவகை செய்து சாலிவாகன சகவருடம் 1437ல் (கி.பி.1515) சிலாசாசனம் ஒன்றை வெளியிட்டார்.

தாசரிபள்ளி பாளையம் உதயமான வரலாறு:-

கைப்பீது பக்கம் - 3

விஜயநகரத்தை அச்சுததேவமகாராயர் ராஜ்ஜிய பரிபாலனம் செய்யும் காலத்தில் அவருடைய மைத்துனரான சலகம் திம்மராஜூ அவர்கள் யுவராஜத்துவம் செய்துக்கொண்டிருந்தார் அப்போது ஜாதியில் "யாங்கர கொல்லவாரான (யாங்கர கொல்லலு)" ஸித்தப்ப நாயுடு தன்னுடைய கூட்டாளிகளை அழைத்துக்கொண்டு ராயர் சமஸ்தானம் சென்று அங்கு யுவராஜனான வீற்றிருந்த சலகம் திம்மராஜூவின் கீழ் சேவகம் செய்துக்கொண்டிருந்தார்கள்.

ஒருமுறை அகோபிலம் தலத்திற்கு அருகில் உள்ள நல்லமலைத்தொடரில் ஜோதி கணவாய் பகுதி வழியாக நரசிங்கபெருமாளை தரிசிக்க பக்தர்களும், பெருவணிகர்களும் வண்டிகட்டிக்கொண்டு மூட்டை முடிப்புகளுடன் செல்லும் போது அப்பகுதியில் இருக்கும் கள்ளர் பெருங்கூட்டம் ஒன்று அவர்களிடம் கொள்ளையடித்துக்கொண்டும், கொடுரமான முறையில் கொலைகளை செய்துக்கொண்டும் இருந்தது. இந்த செய்தி ராஜ்ஜியம் முழுக்க காட்டுத்தீ போல பரவியதால் பூவுலகம்பம், சர்கார் ஆந்திரா போன்ற பகுதிகளில் இருந்துவரும் பக்தர்களும், வணிகர்களும் அகோபிலம் திருத்தலம் செல்வதற்கு அச்சப்பட்டு அங்கு யாத்திரை செல்வதை நிறுத்திக்கொண்டார்கள். இதனால் ஆலயத்தில் ஆள்நடமாட்டமில்லாததால் நரசிங்கப்பெருமாளுக்கு பூஜைகள், உற்சவங்கள், திருவிழாக்கள் நடைபெறாமல் நின்றுவிட்டது. 

கைப்பீது பக்கம் - 4

இந்த விஷயம் அச்சுததேவமகாராயரை எட்டி அவையில் பெரும் விவாதத்தை கிளப்பியது, இந்நிலையை சலகம் திம்மராஜூவை அழைத்து விவங்களை கேட்டபோது. மிகவும் புனிதமான அகோபில ஸ்தலத்திற்கு செல்பவர்கள் அப்பகுதியில் சூழ்ந்துள்ள கொள்ளைக்காரர்களின் அட்டூழியங்களின் காரணமாக அங்கு செல்வதை தவிர்த்துவிட்டார்கள் என்று விவரித்தார். அதற்கு ராயர் தற்போது நரசிங்கப்பெருமாளுக்கு உற்சவ காலம் நடைப்பெற்றுக் கொண்டுள்ளது எனவே நிலைமையை விரைந்து சீர்படுத்தவேண்டும் என்றும், இத்தகைய சூழலை யாரால் சீரமைக்க முடியும் என்றும் திம்மராஜூவிடம் ராயர் கேட்க "விரனேயினி ஸித்தப்பா" என்பவர் நம்முடைய தர்பாரில் இரண்டு வருடங்களாக சேவையாற்றிவருகிறார் அவரிடம் பாளையம் கொடுத்து பாளையக்காரராய் முடிசூட்டிவைத்தால் கொள்ளையர்களை ஒடுக்கி மக்களையும் காத்து, அப்பகுதியின் வசூலில் கிடைக்கும் பொருளாதாரத்தை வைத்து ஆட்சிப்புரிவார் என்று திம்மராஜூ கூற ராயர், மிகவும் நல்லது உடனே ஸித்தப்ப நாயுடுவை அழைத்துவருமாறு கேட்டுக்கொண்டார். 

ஸித்தப்ப நாயுடு தனது உறவினர்களுடன் வந்து ராயரை சந்தித்தபோது அச்சுததேவராயர் அவருக்கு தாசரிபள்ளி பாளையப்பட்டை நிகுதி செய்துக்கொடுத்தார்.

பாளையக்காரராய் முடிசூட்டிய பிறகு அகோபிலம் வனத்தில் உள்ள தாசரிபள்ளிக்கு வந்து அரச அமர்ந்த வீரனேயினி ஸித்தப்ப நாயுடு மிகக் குறுகிய காலத்திலேயே கொள்ளைக்கூட்டத்தவர்களை ஒடுக்கி கொன்றொழித்தார், எஞ்சிய கள்ளர்களை பிடித்துச்சென்று விஜயநகர ராயரிடம் ஒப்படைத்தார். இதன்பிறகு மன்மத வருடம் வரை பாளையத்தை ஆண்டு பின்பு இறைவனடி சேர்ந்தார்.

பாளையப்பட்டை ஆண்ட மன்னர்கள்:-

கைப்பீது பக்கம் - 5

ஸித்தப்ப நாயுடுவிற்கு பிறகு அவரது மகன் விடலபதி நாயுடு அரியணை ஏறி சர்வதாரி வருடம் வரை அரசாண்டார்.

ஸித்தப்ப நாயுடுவின் மகன் ஓபலபதி நாயுடு அரியணை ஏறி ஷோபகிருதி வருடம் வரை அரசாண்டார்.

பிறகு இவரது மகன் எர்ரம நாயுடு அரியணை ஏறி அக்ஷய வருடம் வரை அரசாண்டார்.

பிறகு இவரது மகன் வெங்கடப்ப நாயுடு அரியணை ஏறி அடுத்த அக்ஷய வருடம் வரை மொத்தம் 60 ஆண்டுகள் அரசாண்டார்.

இவரது மகன் நரசிம்ம நாயுடு அரியணை ஏறி விக வருடம் வரை அரசாண்டார்.

இவரது மகன் வெங்கப்ப நாயுடு அரியணை ஏறி பிளவ வருடம் வரை அரசாண்டார் இவரது காலத்தில் தேசத்தை முகலாயர்கள் கொல்லகொண்டாவை மையமாக வைத்து ஆண்டுக்கொண்டிருந்தபோது துவ்வூர் சீமையின் பகுதிகளை பசவாபுரம் பாளையக்காரர்களை ஆக்கிரமித்துக்கொண்டிருந்தனர். அப்போது வெங்கப்ப நாயுடு தனது படைகளுடன் சென்று போரிட்டு ஆக்கிரமிக்கப்பட்ட பகுதிகளை மீட்டுவந்து பின் மரணமடைந்தார்.

இவருக்கு பிறகு இவரது மகன் ராம லிங்கப்ப நாயுடுவை அரியணை ஏற்றி முடிசூட்டினார்கள். இவர் விரோதி வருடம் வரை பாளையத்தை ஆண்டு காலமானார்.

பிறகு இவரது மகன் குமார லிங்கப்ப நாயுடு அரியணை ஏறி விக்ருதி வருடம் வரை அரசாண்டார்.

கைப்பீது பக்கம் - 6

இவரது மகன் மாதப்ப நாயுடு  யுவ வருடம் வரை அரசாண்டார்.

இவரது மகன் ஓபளபதி நாயுடு, தென் தெலுங்கு நாடு கடப்பா நவாப்புகளிடம் கைமாறியபோது ஓபளபதி நாயுடு கடப்பா நவாப்புகளுக்கு வரியாக 1900 வராகங்கள் செலுத்திக்கொண்டு செல்வச்செழிப்புடன் விகாரி வருடம் வரை பாளையத்தை ஆண்டுவந்தார்.

இவரது மகன்கள் நரசிம்ம நாயுடு, ராமா நாயுடு, வெங்கடபதி நாயுடு ஆகிய மூவரும் பாளையத்தின் கிராமங்களை தங்களுக்கு பங்கிட்டுக்கொண்டு தனி தனியே ஆட்சிசெய்துக்கொண்டு, அப்போது ஆட்சியில் இருந்த ஹைதர் அலி நவாபுக்கு வரிசெலுத்திவந்தார்கள்.

பிறகு முகலாயர்களின் ஆளூகைக்கு வந்தபோது கடப்பாவில் சுபேதாரியாக இருந்த சையதுல்லா-உதீன்-கானுக்கு வரிசெலுத்திக்கொண்டு ஆண்டுவந்தார்கள்.

கைப்பீது பக்கம் - 7

இறுதியாக ரௌதிரி வருடத்தில் ஆங்கிலேய பகதூர்களின் ஆதிக்கம் ஏற்பட்டு கும்பிணியர்களிடம் நாடு சென்ற பிறகு பாளையம் பறிக்கப்பட்டு துரைகளால் பாளையத்தின் வாரிசுகளுக்கு ஓய்வூதியம் வழங்கப்பட்டு அவர்கள் தற்போது அனுபவித்துவருகிறார்கள். நரசிம்ம நாயுடு இறைவனடி சேரந்தபிறகு இவரது மகன்களான ராமா நாயுடு மற்றும் வெங்கடபதி நாயுடு ஆகிய இருவரும் சமபங்காக ஓய்வூதியம் பெற்று வருகிறார்கள்.

பாளையப்பட்டின் வம்சாவழிகள்:-

அகோபிலம்-தாசரிபள்ளி

* ஸித்தப்ப நாயுடு  - கி.பி.1588வரை

* விடலபதி நாயுடு  -  கி.பி.1603

* ஓபளபதி நாயுடு  -  கி.பி.1623

* எர்ரம நாயுடு  -  கி.பி.1686

* வெங்கடப்ப நாயுடு  -  கி.பி.1701

* நரசிம்ஹ நாயுடு  -  கி.பி.1721

* வெங்கப்ப நாயுடு

* ராமலிங்கப்ப நாயுடு

* குமார லிங்கப்ப நாயுடு

* மாதப்ப நாயுடு

* ஓபளபதி நாயுடு

* நரசிம்ம நாயுடு

* ராமா நாயுடு

* வெங்கடபதி நாயுடு