குறும கொல்ல (குறுமர்) புராணம் (அல்லது) மல்லண்ணா புராணம்

மல்லண்ணா புராணம் (குறுமர் புராணம்):-

 மல்லண்ணா

ஆதிரெட்டி - நீலம்மா தம்பதியினர்:-




முன்னொரு காலத்தில் கொல்லபுரிப்பட்டணம் என்ற ராஜ்ஜியத்தை ஆதிரெட்டி (காப்பு சமுகத்தவர்) என்ற மன்னர் ஆட்சி செய்து வந்தார். அவரது ராணி நீலம்மா. இத்தம்பதியருக்கு பெயர், புகழ் செல்வம் எல்லாம் இருந்தாலும், அவர்களுக்கு நீண்ட காலமாக குழந்தைச் செல்வம் இல்லை. குழந்தைகளைப் பெற்றெடுப்பதற்காக அவர்கள் பல விரதங்களைச் மேற்கொண்டனர், மற்றும் பல தானதருமங்களையும் செய்து வந்தனர். இறுதியாக அவர்கள் ஒரு சைவ மதகுருவின் ஆலோசனையின் பேரில் ஸ்ரீசைலம் சென்று மல்லிகார்ஜூன சுவாமிக்கு (சிவபெருமான்) ருத்ராட்ச அபிஷேகம் செய்து வழிபட்டனர். இத்தம்பதியினரின் இறைபக்தியால் மனம் மகிழ்ந்த சிவபெருமான் அவர்கள் முன்தோன்றி, நீங்கள் சிவனடியார்களை அவர்களுக்கு தேவையான பணிவிடைகளை செய்து ஆதரித்து வந்தால் நான் உங்களுக்கு குழந்தைப்பேரு ஆசீர்வதிப்பேன் எனக் கூறி வரமளித்தார். இறைவனின் திருவாக்கை மனப்பூர்வமாக ஏற்ற ஆதி ரெட்டி தம்பதியினர் சைவ துறவிகளைப் தாங்கள் பராமரிப்பதாக இறைவனுக்கு வாக்களித்தனர். இறைவனின் கட்டளைக்கு இணங்குவதாக உறுதியளித்தபோது சிவபெருமான்
அவர்களுக்கு ஆறு மகன்களை கொடுத்து ஆசீர்வதித்தார்.

ஸ்ரீசைலம் மல்லிகார்ஜூன சுவாமி

சிலகாலம் கழித்து மகன்கள் வளர்ந்தவுடன், நீலம்மா கஞ்சத்தனம் மிக்கவராகவும் மற்றும் நீலம்மாவின் கணவர் ஆதிரெட்டி ஒரு சுயநல மனிதனாகவும் மாற்றினார். எனவே துறவிகள் மற்றும் சைவ மத குருமார்களுக்கு தாங்கள் வழங்கிவரும் தானங்களை அவர்கள் நிறுத்திக்கொண்டனர். கூடுதலாக, அவர்களை அவமதிக்கவும் தொடங்கினர். 




மேலும், நீலம்மா தானம் கேட்டு தன் வீட்டின் முன் நிற்கும் துறவிகளை துரத்த தம்மநாயுடு என்பவரை தனது வீட்டின் வாயிற் காவலராக நியமித்தார், தம்மநாயுடுவிற்கு நீலம்மா வழங்கிய ஆணையானது, பிச்சை கேட்டு வீட்டிற்கு வரும் அனைவரையும் தடியடி நடத்தி துரத்த வேண்டும் என்பதாகும். அவ்வாறு தடியடிகளுக்கு உள்ளான சைவ குருமார்கள் மற்றும் துறவிகளின் அழுக்குரல் கேட்டு சிவபெருமான் கடுங்கோபமடைந்தார் எனவே ஆதிரெட்டி குடும்பத்திற்கு தகுந்த பாடம் புகட்ட எண்ணினார். ஆதி ரெட்டியின் குடும்பத்தை சோதிக்க சிவபெருமான் துறவி வேடமணிந்து அவர்களின் வீட்டிற்க்கு சென்றார். அப்போது, தம்மநாயுடு, தனது எஜமானர்களின் கட்டளைகளுக்குக் கீழ்ப்படிந்து, சிவபெருமானை அடிக்கத் தொடங்குகிறார், ஆனால் இறைவனை அடித்த பிரம்பு ஒரு தங்க கம்பியாக மாறியது. ஆதிரெட்டி மற்றும் நீலம்மா இதைக்கண்டு வியப்படைந்தனர் இருப்பினும் பேராசை காரணமாக தங்களின் வீட்டில் உள்ள அனைத்து பொருட்களையும் தம்மநாயுடுவிடம் கொடுத்தனர் அவனும் இறைவனை அப்பொருட்கள் மூலம் தாக்கினார் இதனால் அப்பொருட்கள் அனைத்தும் தங்கம் மற்றும் வெள்ளியாக மாறியது. இருப்பினும் துறவி வேடத்தில் வந்த இறைவனுக்கு ஒரு விதையை கூட உணவாக வழங்காமல் அடித்து துன்புறுத்தினர். மோசமாக காயமடைந்த துறவி பின்னர் குப்பைத் தொட்டியின் அருகே வீசப்பட்டார்.






இறை சாபத்தால் ராஜ்ஜியம் இழந்த ஆதிரெட்டி:-

ஜெஷ்டாதேவி 

அடுத்த நாள் அதிகாலையில், செல்லம்மா என்ற கோமட்டி சமுகத்தை சேர்ந்த ஏழைப்பெண் தனது பசுவை கிராமத்தின் குளக்கரை அருகே மேத்துக்கொண்டிருந்த போது, மோசமான காயமடைந்த நிலையில் துறவி  இருப்பதைக் கண்டாள். அவர் மீது பரிதாபப்பட்டு, அவள் அவரை தனது வீட்டிற்கு அழைத்துச் சென்று, காயங்களை சுத்தம் செய்து, மற்றும்
அவரை கனிவுடன் கவனித்துக்கொண்டார். மகிழ்ச்சி அடைந்த இறைவன் அவளுக்கு செல்வச் செழிப்பை ஆசீர்வதித்தார். பிறகாக சிவபெருமான் ஜெஷ்டம்மாவை (அல்லது நாஞ்சரி, தீய சக்திகளின் கடவுளாக கருதப்படுகிறார்), ஆதிரெட்டி மற்றும் நீலம்மாவின் வீட்டிற்கு அனுப்பவைத்து, ஆதிரெட்டி, நீலம்மாவின் குடும்பம், செல்வம் மற்றும் அவர்களின் ராஜ்ஜியத்தை அழிக்க உத்தரவிட்டார். இதன் விளைவாக, இத்தம்பதியினருக்கு சொல்லமுடியாத துயரங்களை எதிர்கொள்ள, அவர்களின் செல்வங்கள் அனைத்தையும் இழந்தனர், கொல்லபுரிபட்டணம் கடுமையான பஞ்சம், ஏற்பட்டு மக்கள் பசியால் ஏராளமாக உயிரிழந்தனர். ராஜ்ஜியம் முற்றிலும் பாழானது.
பஞ்சத்தில் இருந்து தப்பியவர்கள் மற்ற பகுதிகளுக்கு குடிப்பெயர்ந்தனர், மற்றும் ஆதிரெட்டி தம்பதிகள் ராஜ்ஜியத்தை விட்டு வெளியேறி
காடுகளுக்குச் செல்ல வேண்டிய கட்டாயம் ஏற்பட்டது. காட்டிலும் ஜெஷ்டாதேவி அவர்களைப் பின்தொடர்ந்து, அவர்களுக்கு முடிவில்லாமல் தொந்தரவுகளை செய்தாள், மேலும் அவர்களுக்கு உணவு முதலிய அத்தியாவசிய பொருட்கள் எதுவும் கிடைக்காமல் பார்த்துக் கொண்டாள்.





சாபம் நீங்குதல் மற்றும் மல்லண்ணா பிறப்பு:-




பின்னர், பட்டினியால் வாடிய நீலம்மாவின் குடும்பத்தினர், அவளின் சகோதரர்களின் இராஜ்ஜியமான கல்யாணபுரிக்குச் சென்றனர், ஆனால் அங்கேயும்,  ஜெஷ்டாதேவியின் சக்திகளால் நீலம்மாவின் சகோதரர்களும் அவர்களுடைய மனைவிகளும் அவர்களை அவமதித்து அனுப்பினர். பட்டினி கிடக்கும் குழந்தைகளை பார்த்து தாங்கிக்கொள்ள முடியாத, தம்பதியினர் தொழிலாளர்களாக வேலை செய்ய முற்படும்போது, ​​அவர்களின் முதலாளியும் அவர்களை கடுமையாக அவமதித்து அனுப்பினார். கிராமத்தின் எல்லையில் ஒரு சிறிய குடிசை அமைத்து வசித்தனர், பெரும் ஏழ்மையின் காரணமாக அவர்கள் தங்கள் குழந்தைகளுக்கு கீரைகளையும், வேர்களையும் ஊட்டி, ஒரு மோசமான வாழ்க்கையை வாழ்ந்து வந்தனர். இத்தகைய பரிதாபகரமான சூழ்நிலையில், நீலம்மா சிவனின் வார்த்தைகளை நினைவு கூர்ந்தாள், அவள் செய்த தவறுகளை உணர்ந்து, சிவபெருமானிடம் பிராத்தணை செய்தாள். மனமிறங்கிய ஈசன் ஒரு துறவி போல் தோன்றி பிச்சை கேட்டுவந்தார். ஆனால் நீலம்மா தனக்கிருந்த ஏழ்மை நிலையை துறவி உருவில் வந்த இறைவனிடம் வெளிப்படுத்தினாள். துறவி வேடத்தில் வந்த சிவன் அவள் வீட்டில் இருக்கும் மண்ணை அள்ளி எடுத்து வந்து தனது சாக்கு பையில் நிரப்புமாறு நீலம்மாவிடம் கேட்டார். இறைவனின் சொல்படியே நீலம்மா செய்தாள். ஆவ்வாறு செய்த மாத்திரத்தில் துறவியின் சாக்குப்பையில் போடப்பட்ட மண் எல்லாம் தங்கக் குவியல்களாக மாறியது. நீலம்மா மனமகிழ்ச்சி அடைந்தாள். "உனது பாவங்களுக்கான தண்டனை காலம் இன்றோடு முடிந்தது"  எனக்கூறி சிவபெருமான் தனது உண்மையான வடிவத்தில் தோன்றினார்.  

நீலம்மாவிற்கு துறவி வடிவில் வந்து அருள்புரிந்த ஈசன்

நீீீீலம்மா கடந்த காலத்தில் செய்த தவறுகளை அவர் நினைவுபடுத்தினார், மற்றும் அவர் அவர்களுடைய ராஜ்ஜியத்தையும், செல்வத்தையும் மீண்டும் வழங்கினார், மேலும் மற்றொரு குழந்தையையும் ஆதிரெட்டி, நீலம்மா தம்பதியினருக்கு அருளியும் தெய்வாம்சம் பொருந்திய குழந்தைக்கு, மல்லண்ணா எனப்பெயரிடுமாறும் அறிவுறுத்துவிட்டு சிவபெருமான் மறைந்துவிட்டார். ஒன்பது காடியாக்களுக்குள் (ஒரு காடியா 24 நிமிடங்களுக்கு சமம்), தண்டகரண்யாவின் பவுல்கடாவில் நகரத்தில், அவர் மல்லண்ணாவைப் பெற்றேடுத்தார். இயற்கைக்கு அப்பாற்பட்ட சக்திகளோடு பிறந்த குழந்தை மல்லண்ணாவின் சக்தியால்  பவுல்கட்டா அரண்மனைகள் நிறைந்த நகரமாக உருவானது. எனவே ஆதிரெட்டி மற்றும் நீலம்மா தாங்கள் இழந்த செல்வத்தையும், ஆட்சியையும், ராஜபோக வாழ்க்கையையும் மீண்டும் பெற்றனர். குழந்தை மல்லண்ணா பாலபருவம் எட்டியவுடன் அவரின் தந்தை ஆதிரெட்டி, மல்லண்ணாவை அருகிலுள்ள கல்யாணபுரிக்கு கல்விபயில்வதற்காக அனுப்பிவைத்தார். மல்லண்ணா கல்யாணபுரி குருக்குலத்தில் தங்கியிருந்த காலத்தில், அவருக்கும் தானய்யா மற்றும் கவுசல்யாவின் மகன் வாட்லா சங்கண்ணாவுடன் நட்பு கொண்டார். மல்லண்ணா தனது கல்வியை முடிக்கும் தருவாயில், அவர் இளையபருவம் அடைந்தவராக குருக்குலத்தை விட்டு விடைப்பெற்றார்.

சிவபெருமான் பார்வதிதேவி

கல்வி முடித்து தாய், தந்தையினரிடம் வந்தடைந்த மல்லண்ணாவிடம் ஒரு நாள் அவரின் தாய் நீலம்மா கடந்த காலத்தில் நிகழ்ந்த தங்களின் குடும்ப வரலாற்றை கூறினார். தங்களின் பூர்வீக ராஜ்ஜியமான கொல்லபுரிப்பட்டிணத்தை மீட்கும் பொருட்டு மல்லண்ணா
கல்யாணபுரிக்குத் திரும்பி, கொல்லபுரி இராச்சியத்தை மீண்டும் உருவாக்க தனது தாய் மாமன்களின் உதவியை நாடினார், அவர்களின் உதவியுடன் மல்லண்ணா மீண்டும் கொல்லபுரிப்பட்டிணத்தை கட்டியெழுப்பி அதன் சிம்மாசனம் ஏறினார். தனது திறமையான நிர்வாகத்தால் அனைத்து தரப்பு மக்களாலும் பெரிதும் விரும்பப்பட்டார். மேலும், அவரது ஆட்சியில் கொல்லபுரிபட்டிணத்து மக்கள் அமைதியான மற்றும் மகிழ்ச்சியான வாழ்க்கையை நடத்திவந்தனர். சிவபெருமானும், பார்வதிதேவியும் மல்லண்ணாவின் நல் ஆட்சியில் மகிழ்ச்சி அடைந்து மும்மாரி மழையை அவ்வூருக்கு அளித்து செழுமைப்படுத்தினர்.





மல்லண்ணா - தேவகிரி இளவரசி திருமணம்:-




ஒரு நாள் கைலாயத்தில் பார்வதிதேவி, இளைஞான மல்லண்ணாவிற்கு ஒரு பெண்னை செய்து வைக்க அவரின் பெற்றோர்களை தூண்டுமாறு சிவபெருமானிடம் கோரிக்கை வைத்தார். பார்வதிதேவியின் கோரிக்கையை ஏற்ற சிவபெருமான் மல்லண்ணாவின் அரண்மனைக்கு துறவி வேடத்தில் சென்று, பிச்சை கேட்டார். அப்பொழுது
மல்லண்ணா துறவி வடிவில் வந்த சிவபெருமானுக்கு பழங்களை வழங்க முன்வந்தபோது, சிவபெருமான் மல்லண்ணாவிடம் உனக்கு திருமணமாகிவிட்டதா ??? என கேட்டார், மேலும், பிரம்மச்சாரிகள் துறவிக்கு பிச்சை வழங்க உரிமை இல்லை என்றும் கூறினார். மல்லண்ணா பிச்சையாக கொடுக்க வந்த பழங்களை அவர் ஏற்கவில்லை " நீ பிரம்மசாரி நீ இடும் பிச்சையை என்னால் ஏற்க முடியாது. உனக்கு திருமணமான பிறகு நான் இதே அரண்மனைக்கு வந்து உன்னிடம் பிச்சை வாங்கிக்கொள்கிறேன்" எனக் கூறிவிட்டு துறவி (சிவபெருமான்) சென்றுவிட்டார். 




தன்னிடம் உதவி கேட்டு வந்த ஒருவருக்கு தன்னால் உதவமுடியவில்லையே என்பதை நினைத்து மல்லண்ணா மனம் வருந்தினார். எனவே, அவர் திருமணம் செய்துக்கொள்ள முடிவு செய்து தனது தாயிடம் தனது முடிவை தெரிவித்தார். மனம் மகிழ்ந்த நீலம்மா திருமணத்தரகரை அழைத்து தனது மகனுக்கு அரசக்குடும்பத்தில் இருந்து பொருத்தமான பெண்ணை தேடி கொடுக்குமாறு அனுப்பிவைத்தார். இறுதியாக, தேவகிரியின் மன்னரான கொல்ல தர்மா ரெட்டி (கொல்லவார்) மற்றும் மூசாம்பாளின் மகளான பத்மாவதி (பத்மாக்ஷி) என்கிற இளவரசி மல்லண்ணாவிற்கு பொருத்தமானவள் என நீலம்மா முடிவுசெய்து மல்லண்ணாவிடம் கூறினார். மல்லண்ணாவிற்கும் இளவரசியை பிடித்து போனதால் தனது தோழனான சங்கண்ணாவை தேவகிரி ராஜ்ஜியத்திற்கு சம்மந்தம் உறுதி செய்து வர அனுப்பிவைத்தார். கொல்ல தர்மா ரெட்டியின் அவைக்கு சென்று அவர்கள் கேட்ட வரதட்சணைகள் மற்றும் ஒப்பந்தங்களுக்கு ஒப்புக்கொண்டு திருமணம் நிச்சயம் பேசிவிட்டு கொல்லபுரிப்பட்டிணம் திரும்பினார். மல்லண்ணாவை சந்தித்து திருமணத்திற்காக தேவகிரி ஆட்சியாளர்கள் விதித்த நிபந்தனைகளை கூறினார். கொல்ல தர்மா ரெட்டி கேட்ட வரதட்சணை தொகைய திரட்டுவதற்காக மல்லண்ணா தனது தாய் மாமன்களிடம் உதவி கேட்டார். ஆனால், அவர் தனது மகளை திருமணம் செய்துக்கொண்டால் வரதட்சணை தொகையை கொடுக்கமுடியும் எனக் கூறினார். மல்லண்ணா தனது தாய்மாமனின் கேரிக்கையை ஏற்க மறுத்ததால் அவர் மல்லண்ணாவிற்கு உதவ முன்வரவில்லை.

செல்வக்குவியல்

தனது தாய்மாமன்களின் செயலால் மகுந்த கோபமடைந்த மல்லண்ணா தனது தோழன் வாட்லா சங்கண்ணாவை படைகளுடன் அனுப்பி கல்யாணபுரியின் தன்யாளகோட்டையில் உள்ள கருவூலத்தை கொள்ளையடித்து வருமாறு உத்தரவிட்டார். அவ்வாறு கொள்ளையடித்து வரப்பட்ட பணத்தால்
கொல்லபுரியிலிருந்து தேவகிரி வரை பிரம்மாண்ட பந்தல்கள் அமைத்து கொள்ளையிடப்பட்ட புதையல்களுடன் தேவகிரிக்குச் சென்று, பொக்கிஷங்களைத் கொல்ல தர்மா ரெட்டியிடம் கொடுத்து, பத்மாவதி தேவியை ஒரு பிரமாண்டமான மேடையில் வேத மந்திரங்கள் முழங்க மேளத்தாளங்களுடன் தாலிக்கட்டி, பெரியவர்கள் ஆசீர்வாதங்களுடன்  திருமணம் செய்து கொண்டார். 





அண்ணிகளின் சூழ்ச்சி:-




திருமணம் முடிந்தவுடன் பத்மாவதி தேவியுடன் தனது ராஜ்ஜியத்திற்கு திரும்பினார் மல்லண்ணா. ஆனந்தத்தில் இருந்த திருமண தம்பதியரைப் பார்த்து, பொறாமை கொண்ட மல்லண்ணாவின் அண்ணன்களின் மனைவிகள் பல சதித்திட்டங்களை தீட்டினர். இதன்விளைவாக அவர்கள் மல்லண்ணாவின் சகோதரர்களின் மனதில் நஞ்சை விதைத்தனர், இறுதியாக மல்லண்ணாவை ராஜ்ஜியம் விட்டு துரத்தி விவசாயத்திற்கு அனுப்புவதில் அண்ணிகள் வெற்றிப்பெற்றனர். எனவே வயலில் விவசாயம் செய்து வந்தார் மல்லண்ணா, சிறிது காலம் கழித்து கொல்லபுரிப்பட்டிண ராஜ்ஜியத்தை ஆண்டு வந்த மல்லண்ணாவின் சகோதரர்கள் நிர்வாகத்திறனில் தோல்வியடைந்தனர். எனவே மல்லண்ணாவை மீண்டும் அரியணை ஏறுமாறு கேட்டுக்கொண்டனர். சகோதரர்களின் கோரிக்கையை மறுக்க முடியாமல் மல்லண்ணா ஏற்றார். ஆனால் மல்லண்ணா மீண்டும் அரியணை ஏறியது அவரது அண்ணிகளுக்கு பிடிக்கவில்லை எனவே அவர் எப்போது, ​ அரசவைக்கு செல்கின்றாறோ, அப்போது அவருடைய அண்ணிகள் பத்மாவதிதேவியை ஒரு அடிமைப்போல் தங்களுக்கு சேவை செய்ய வற்புறுத்தி கொடுமைகள் செய்தனர். தனது கணவரின் மகிழ்ச்சிக்கு, எந்த பங்கமும் ஏற்பட்டு விடக்கூடாது என்ற தனது தூய அன்பின் காரணமாக மல்லண்ணாவின் அண்ணிகள் செய்த அனைத்து சித்திரவதைகளையும் தாங்கிக்கொண்டாள். 




எப்பாடுபட்டாவது மல்லண்ணாவை ராஜ்ஜியத்தை விட்டு வெளியேற்றுவதில் அவருடைய அண்ணிகள் உறுதியாக இருந்தனர். இந்த திட்டத்தின் ஒரு பகுதியாக, கணவர்கள் இல்லாத நிலையில், அண்ணிகளில் மூத்தவர் - ஒலனக்கிதேவி - மல்லண்ணாவை தனது அறைக்கு வரவழைத்து தன்னிடம் தவறாக நடந்துக்கொள்ள முயன்றதாக மல்லண்ணா மீீீது பழிசுமத்தினார். இத்தகு அவதூறு மற்றும் அவமானத்தை தாங்க முடியாமல், மல்லண்ணா தனது பெற்றோர், மனைவி மற்றும் மூத்த சகோதரர்களுக்கு அவரது முகத்தை கூட காட்டாமல், இராஜ்ஜியம் விட்டு வெளியேற முடிவெடுத்தார். ஆனால், அவரது ஆத்மார்த்தமான நண்பனான வாடலா சங்கண்ணா மல்லண்ணாவை தடுத்து நிறுத்தினார். மல்லண்ணாவை பற்றிய அவதூறு செய்தி காட்டு தீ போல ராஜ்ஜியம் எங்கும் பரவியது. இதனால் மல்லண்ணாவின் மனைவி பத்மாவதி மற்றும் தாய் நீலம்மா மிகுந்த வருத்தமடைந்தனர். இதை சகித்துக் கொள்ள முடியாத, சங்கண்ணா அவர்களுக்கு உண்மையை வெளிப்படுத்தினார் மற்றும் அவர்களை சமாதானப்படுத்தினார். பின்னர் அவர் கொல்லபுரிப்பட்டிண அரசவையில் மல்லண்ணா மீது இழைக்கப்பட்ட அவமதிப்பு பற்றி கேள்வி எழுப்பினார். இனப்பிரச்சினைக்கு தீீீர்வு காணும் விதமாக வழக்கில் சம்மந்தப்பட்ட இருவரையும் தெய்வங்கள் மீது  சத்தியம் செய்யவைத்து, மல்லண்ணாவின் பக்கம் இருந்த நீதியை சங்கண்ணா வெளிப்படுத்தினார். எனவே மல்லண்ணாவின் மீதான களங்கம் நீங்கியது.





ராஜ்ஜியத்தை துறந்து விவசாயத்தில் ஈடுபடுதல்:-

காணி நிலம்

மல்லண்ணாவிற்கு அவரது சகோதரர்கள் மற்றும் அண்ணிகளின் தீய செயல்களால் வெறுப்புணர்வு ஏற்பட்டது. எனவே ராஜ்ஜியத்தை அவரின் சகோதரர்களிடமே ஒப்படைத்துவிட்டு ஜங்கலா மண்யத்தில் உள்ள தரிசு நிலங்கள் அவரது பங்காக பெற்றுக்கொண்டு, ராஜ்ஜியத்தை விட்டு தன் மனைவியுடன் வெளியேறினார். மீண்டும் விவசாயத் தொழிலுக்கு திரும்பிய மல்லண்ணா
ஒரு நாள் கலப்பை மற்றும் காளைகளைத் வாட்லா சங்கண்ணாவின் உதவியைப் பெற்று நிலத்தை உழுவதற்காக தயார்படுத்திக்கொண்டு ஜங்கலா மண்யம் வரை நிலத்தை உழுதுக்கொண்டிருந்தார் அப்போது, மல்லண்ணாவின் மனைவி பத்மாவதி
அவருக்கு மதிய உணவை எடுத்துச் வந்தார். ஆனால் மல்லண்ணா பத்மாவதியை அழைத்து அவர் கொண்டு வர மறந்த பருத்தி விதைகளை எடுத்து வரச்சொல்லி வீட்டிற்கு திருப்பி அனுப்பினார். பிறகு மல்லண்ணா நிலத்தை உழுதுக்கொண்டிருந்தபோது ஏர்க்கலப்பை மண்ணில் உறுதியாக சிக்கிக்கொண்டது எவ்வளவு முயன்றும் அவரால் ஏர்கலப்பையை வெளியில் எடுக்கமுடியவில்லை. எனவே துக்கமைடந்த மல்லண்ணா பார்வதிதேவியை வேண்டினார். வழிப்பட்ட மாத்திரத்தில் கண் முன் தோன்றிய பார்வதி தேவி தங்க மற்றும் வெள்ளி ஆடுகளை உருவாக்கினார். மேலும் அந்நிலத்தின் நாலில் ஒருபங்கு வரை திரும்பி பார்க்காமல் நடந்து செல்லுமாறு மல்லண்ணாவிற்கு பார்வதி தேவி கட்டளையிட்டார். அவ்வாறே திரும்பி பார்க்காமல் மல்லண்ணா சென்றுகொண்டிருக்கும் நேரத்தில் தங்க மற்றும் வெள்ளி ஆடுகள் நிலத்தில் பெருகிக்கொண்டே இருந்தன. ஒரு மையில் தூரம் சென்ற பிறகு மல்லண்ணா தன்னையும் அறியாமல் திரும்பி பார்த்துவிட்டார் உடனே ஆடுகளின் பெருக்கம் நின்றது. கோபமடைந்த பார்வதிதேவி தன் சொல்படி நடக்காத மல்லண்ணாவின் கன்னத்தில் அடித்தார். மேலும் இனி இந்த ஆடுகளை மேய்த்துதான் உன் வாழ்வாதாரத்தை நடத்தவேண்டும் எனக்கூறி சில நிபந்தனைகளை மல்லண்ணாவிற்கு விதித்தார் அதன்படி:-





* ஆடுகளை அடிக்கவோ துன்புறுத்வோ கூடாது.



* ஆடுகளை மிகுந்த கவனத்துடன் பார்த்துக்கொள்ள வேண்டும்.



* இந்த ஆட்டு மந்தைக்கு பெண்கள் வரலாம் ஆனால் மந்தையை பராமரிக்கும் வேலை செய்யக்கூடாது.



* துணி துவைப்பதற்கு சக்கிலியின் உதவியையோ, சவரம் செய்வதற்கு மங்கலியின் உதவியையோ நாடக்கூடாது. யார் துணையும் இல்லாமல் நீயே செய்யவேண்டும்.



* மந்தைகள் களவு போகாமல் காப்பாற்ற ஒரு நாயை காவலுக்காக வைக்க வேண்டும்



* மந்தையின் அருகில் எப்போதும் தீச்சுடர் எரிந்துக்கொண்டே இருக்கவேண்டும்.

ஆட்டு மந்தை

போன்ற கட்டளைகளை பார்வதி தேவி இட்டார். மேலும் மல்லண்ணாவிற்கு உதவியாக இருக்க பேயண்ணா என்ற உதவியாளரையும் உருவாக்கி கொடுத்துவிட்டு பார்வதிதேவி மறைந்தார். தேவி இட்ட கட்டளையின் அடிப்படையில் மல்லண்ணா தனது மனைவி பத்மாதேவியை தனது தாயாரான நீலம்மா உடன் இருந்துக்கொள்ளுமாறு கூறி கொல்லபுரிக்கு அனுப்பிவைத்தார்.






ரத்னங்கி - மல்லண்ணா திருமணம்:-




மல்லண்ணாவும் பேயண்ணாவும் மிகவும் பொறுப்புடன் மந்தைகளை மேய்த்து, வாழ்ந்து வந்தனர். காட்டில் விளையும் கீரைகள், வேர்கள் , மற்றும் தனது ஆடுகள் மூலம் கிடைக்கும் பால், தயிர் மற்றும் வெண்னெய் ஆகிய பொருட்களை கிராமங்களுக்கு சென்று விற்றும் அவைகளையே தங்களது உணவுகளாகவும் உட்கொண்டு வந்தனர் . ஒரு நாள், பலத்த மழை மற்றும் அதன் விளைவாக வெள்ளம், மந்தையின் முன் எரியவைக்கப்பட்ட  தீச்சுடர் மங்கலானது. ஆனால், கட்டளையிட்டபடி
பார்வதி தேவி தீச்சுடர் எப்போதும் தொடர வேண்டும், ஒருபோதும் அனையக்கூடாது. நெருப்பை
மீண்டும் ஒளிரவிட, மல்லண்ணாவுக்கு தீப்பொறி தேவைப்பட்டது, இதைப் பெற அவர் பொக்கலசிரிகோட்டா சென்றார். கோட்டையில் ஒரு அழகானப் பெண்னை சந்தித்து அவளின் அழகைக் கண்டு மயங்கினார். மல்லண்ணா அவளைப் பற்றி விசாரிக்கும் போது, ​​அவள் தனது பெயர் ரத்னங்கி என்றும் தான் ஒருபிராமணப் பெண் எனவும், மார்தாண்டா என்ற பெண் அரக்கி தன்னுடைய தாயைக் கொன்றுவிட்டு தன்னை கடத்திச்கொண்டு வந்து இக்கோட்டையில் சிறைவைதுள்ளதாகவும் கூறினாள். மேலும் மல்லண்ணாவிடன் தன்னை இச்சிறையில் இருந்து மீட்குமாறு வேண்டினாள். கோரிக்கையை ஏற்றுக்கொண்ட மல்லண்ணா முதலில் நெருப்பை மந்தைக்கு சென்று எரியவைத்துவிட்டு பிறகு வந்து அவளை காப்பதாக வாக்களித்தார். ஆனால் ரத்னங்கி அவரை நம்பவில்லை, ஒரு மதிப்புமிக் பொருளை தன்னிடம் கொடுத்துவிட்டு செல்லுமாறு அவள் கூறினாள். மல்லண்ணா தனது கீலு கட்டியை அவளிடம் கொடுத்துவிட்டு, தீப்பொறியை எடுத்துக்கொண்டு, மந்தைக்குச் சென்றார், மந்தையில் அனையவிருந்த நெருப்பை வெற்றிகரமாக காத்தார். பின்னர் அவர் தனது கீலு கட்டியை மறந்துவிட்டதாக பேயண்ணாவிடம் தெரிவித்துவிட்டு
அதை எடுக்க கோட்டைக்குத் திரும்பினார். இதற்கிடையில் வேட்டைக்குப் பின், கோட்டைக்கு திரும்பிய பெண் அரக்கி, ரத்னங்கியை பலிக்கொடுக்க தயாராகி தனது ராட்சத கத்தியை ஓங்கினாள், அந்த கண நேரத்தில் கோட்டைக்குள் நுழைந்த மல்லண்ணா அரக்கியுடன் மிகக் கடுமையாக போர் செய்து மார்தாண்டா என்னும் அக்கொடிய அரக்கியை கொன்றார் . அரக்கி இறப்பதற்கு முன்
கொல்லவார்கள் கம்பளி போர்வைகளை நெய்ய உதவியாக தனது எலும்புகளைக் கொண்டு ஊசியாக உருவாக்கி பயன்படுத்துமாறு மல்லண்ணாவிடம் தனது இறுதி கோரிக்கையை முன்வைத்தாள். அரக்கியின் வேண்டுகோளை ஏற்ற, மல்லண்ணா அரக்கியின் மண்டை ஓடு, கன்னத்து எலும்புகள், விலா எலும்புகள், நகங்கள், முடி ஆகிய பொருட்களை சேகரித்துக்கொண்டு 
 மற்றும் ரத்னங்கியை சிறையிலிருந்து மீட்டு அழைத்துச்கொண்டு தனது இருப்பிடத்திற்கு திரும்பினார்.

மார்த்தாண்டா அரக்கி

மந்தையில் பணிசெய்துக்கொண்டிருந்த பேயண்ணா, ஒரு பெண்ணுடன் மல்லண்ணாவைக் வருவதை கண்டான், இறைவியின் ஆணையை மல்லண்ணா மீறிவிட்டதாக கருதி கோபங்கொண்டு மல்லண்ணாவின் மீது கற்களை வீசி தாக்குதல் நடத்தினான்.
மல்லண்ணாவுடன் போயண்ணா கற்களை வீசி சண்டையிட்டுக்கொண்டிருந்த போது, ​​திடிரென நிகழ்விடத்தில் பார்வதி தேவி தோன்றி அவர்களை சமாதானப்படுத்தினார். மேலும், மல்லண்ணா சிவபெருமானின் அவதாரம் என்றும் ரத்னங்கி தனது சொந்த அவதாரம், மற்றும் இருவரும் ஒருவருக்காக ஒருவர் என சேர்ந்து வாழவே பிறந்தனர் என
 பேயண்ணாவிடம் பார்வதி தேவி கூறினார். பிறகு இருவருக்கும் திருமணம் செய்துவைக்க எண்ணிய பார்வதிதேவி தனது தலையில் இருந்த வெள்ளை ரோமங்களை பிடுங்கி, புனிதமான கங்கண கயிராக உருவாக்கினார்.
அத்துடன், மல்லண்ணா மற்றும் ரத்னங்கி ஆகியோரிடம் கங்கணகயிற்றை வழங்கி ஒருவருக்கொருவர் கட்டிக்கொள்ளுமாறு கட்டளையிட்டார், எனவே இருவரின் திருமணமும் இறைசாட்சியாக நடந்து முடிந்தது. 





மல்லண்ணா மற்றும் அவரது மனைவிகள் இறைநிலையடைதல்:-

ரத்னங்கி - மல்லண்ணா - பத்மாவதிதேவி

திருமணம் முடிந்த கையோடு
ரத்னங்கியுடன் மல்லண்ணா கொல்லபுரிப்பட்டணம் சென்றார். அங்கே மல்லண்ணாவின் இரு மனைவிகளுக்கும் இடையில் ஒரு உரிமை சண்டை ஏற்ப்பட்டது. எனவே, மல்லண்ணா ஒரு முடிவெடுத்து ஆற்றின் இருபுறமும் இரண்டு அரண்மனைகள் என தனது இரு மனைவிகளுக்கும் உருவாக்கி கொடுத்து பிரச்சனை தீர்ந்து வாழ்நது வந்தார். சில மாதங்கள் கழித்து ரத்னங்கி இருநூற்றுரெண்டு குழந்தைகளைப் பெற்றெடுத்தார். அப்பிள்ளைகள், தன் தாய் ரத்னங்கியை, தந்தை மல்லண்ணா ஒரு கம்பளி கங்கணம் (உன்னி கங்கணம்) கட்டி திருமணம் செய்த காரணத்தினால் உன்னி கங்கணம்வாரு அல்லது குறும கொல்ல (குறுமர்) என அழைக்கப்பட்டனர். சிறிது காலம் கழித்து, மல்லண்ணா தனது துணைவியார் பத்மாவதியை வலதுபுரமும், இடதுபுறத்தில் ரத்னங்கியையும் சேர்ந்து அமர்ந்து சிலை வடிங்களாக மாறி தெய்வவடிவமானார்கள். அவர்களின் குழந்தைகளான குறுமர்கள் தனது பெற்றோர்களுக்கு அதே இடத்தில் அவர்களுக்கு ஒரு கோவில் எழுப்பி அவர்களை வணங்கிவந்தனர்.

குறிப்பு:-




மல்லண்ணா கதைகள் இருவகை உண்டு. அவ்வகையில் மேற்கூறப்பட்டுள்ள கதை குறும கொல்ல (அல்லது) குறுமர்களின் தோற்றம் குறித்து அம்மக்களாலேயே கூறப்படும் புராணக்கதை ஆகும்.