வடுக ஆயர் (பூஜ கொல்லவார்) - இராஜபாளையம் கல்வெட்டு

 

திரு வாணாத தேவர் காலத்து வடுக ஆயர் (பூஜ கொல்ல) கல்வெட்டு:- 

இராஜபாளையம் வட்டம் சோலைச்சேரி கல்வெட்டு

விருதுநகர் மாவட்டம், ராஜபாளையம் அருகிலுள்ள "சோலைச்சேரி" ஊரில் உள்ள இக்கல்வெட்டு சேத்தூரைத் தலைமையிடமாகக் கொண்ட அரசாகிய ராஜஸ்ரீ திரு வாணாத சேவகப்பாண்டிய மகாராஜா பற்றிய தகவலைத் தருகிறது. 

கல்வெட்டின் வரிகள்:-

கல்வெட்டு

1. ஶ பாண்டி விநாயகர் துணை

2. சேத்தூர் மகாராஜா ௵ வடம

3. லை திரு வாணாத சேவகப் பாண்

4. டிய மகாராஜா அவர்களின் 

5. அனுக்கிரகத்தினால் சோலை சே

6. ரி வடுகாயர் பெத்த நல்லு

7. நாயக்கர் மகன் பெத்த நல்லு

8. நாயக்கர் உபயம்

9. கொல்லம்௯௩ஶபங்குனி.

 

{இறுதிப் பகுதி உடைந்துள்ளது}

கல்வெட்டு கூறும் செய்தி:-

இராஜபாளையம் கல்வெட்டு

விருதுநகர் மாவட்டம், இராஜபாளையம் வட்டம், சோலைச்சேரி ஊரைச் சேர்ந்த வடுகாயர் சமூகமாக  அறியப்பட்ட, தெலுங்கு பூஜகொல்லவார் ஜாதியைச் சேர்ந்த பெத்தநல்லு நாயக்கர் மகனாகிய பெத்த நல்லு நாயக்கர் சேத்தூர் அரசராகிய ஸ்ரீ ராஜஸ்ரீ

"திரு வாணாத சேவகப்பாண்டிய மகாராஜா" அவர்கள் அருளால் எழுப்பிய கோயிற் பணியைச் சுட்டுகிறது.  கல்வெட்டு அருகிலேயே பெத்த நல்லு நாயக்கர் மற்றும் அவரது மகனான மற்றொரு பெத்த நல்லு நாயக்கர் இருவரும் நின்று வணங்கிய நிலையில் சிலைவடிவமாகக் காணப்படுகின்றனர். 

கல்வெட்டு காட்டும் வரலாறு:-

நெல்லையில் "தச்சனூர் அருளாளன் சேவகத்தேவன்" என வாணாதிராயர் ஒருவரை தனது பாண்டிய நாட்டில் "வாணாதிராயர்கள் எனும் நூலில் முனைவர்.திரு.வேதாச்சலம் அவர்கள் தெரிவிக்கிறார்கள். "சேவகத்தேவன்" எனும் பட்டமும் சேத்தூர் அரசர்கட்கு வழங்கிவருவதும் நாம் கண்கூடாகக் காணும் உண்மை ஆகும். 

 மேலுள்ள கல்வெட்டில் சேத்தூர் அரசர்களுக்காக வடுகாய நாயக்கர் சமூகத்தின் பெத்த நல்லு நாயக்கர் மகனாகிய பெத்த நல்லு நாயக்கர்  {தகப்பனார் -மகன் இருவருக்கும் ஒரே பெயர்} தமது விசுவாசத்தால் செய்த அறச்செயல் அறியவருகிறது.  இது மதுரை நாயக்கர் மேலாண்மையை ஏற்காது வாணாதிராயர் கீழ் தம்மை பணித்துக்கொண்ட தும்பிச்சி நாயக்கரை நமக்கு ஞாபகத்திற்கு கொண்டு வருகிறது.  வாணர்களுடைய வரலாறு முழுமையடைய வேண்டுமெனில் ,வத்திராயிருப்பு -சேத்தூர் - கொல்லங்கொண்டான்- தலைவன்கோட்டை -சங்கரன்கோயில் பகுதி மறவர்கள் பற்றி ஆய்வுகள் முழுமையடைய வேண்டியது இங்கு அவசியமாகிறது. 

குறிப்பு:-

பூஜ கொல்லவார்களின் குடிப்பெயர்வு வரைப்படம்

ஓங்கோல் To நெல்லூர் To திருப்பதி To காஞ்சிபுரம் To திருச்சி
To மதுரை To விருதுநகர் To திருநெல்வேலி

காட்டமராஜூவின் நெல்லூர் சோழர்களுக்கு எதிரான யுத்தத்திற்கு பிறகு ஒங்கோல் (பிரகாசம் மாவட்டம்) பகுதிகளில் இருந்த சில பூஜ கொல்லவார் குழுக்கள் நெல்லூருக்கு குடியேறியும் பிறகு அங்கு பஞ்சம் ஏற்பட்ட காரணத்தினால் தங்களின் மந்தைகளோடு தென்திசை நோக்கி இடம்பெயர்ந்து, திருப்பதியையும், காஞ்சிபுரத்தையும் வந்தடைந்தனர் என்பதையும் கதைப்பாடல்வழி அறியமுடிகிறது. பிறகு அங்கிருந்து திருச்சிக்கும் திருச்சிக்குத் தெற்கு நோக்கி மதுரைக்கும் இடம்பெயர்ந்த போது அங்கு ஆட்சி செய்துக்கொண்டிருந்த சௌந்தரபாண்டியன் என்னும் பாண்டிய மன்னன், அவர்களை மேலும் தெற்கு நோக்கி அனுப்பினான் என்றும் செவிவழிச்செய்தி' வழங்கப்பெற்று வருகிறது.

பிற்காலப் பாண்டியர்களில் பன்னிரெண்டாம் நூற்றாண்டின் இறுதியில் அதாவது கி.பி.1276இல் குலசேகரப் பாண்டியன், இவனது மகன் இரண்டாம் சடையவர்மன் சுந்தரபாண்டியன், மற்றொரு மகனான சடையவர்ம வீரபாண்டியன் ஆகிய மூவரும் பாண்டிய நாட்டைச் சமகாலத்தில் ஆண்டுவந்தனர். இவர்களில் வடுக ஆயர்கள் குறிப்பிடும் பாண்டியன் இரண்டாம் சடையவர்மன் சுந்தர பாண்டியன் ஆவான். வெனிஸ் நகரப் பயணியான மார்கோபோலோ இவனது பெயரைச் சௌந்தர பாண்டித் தேவர் (Soundar Bandi Devar) என்று தமது குறிப்புகளில் குறித்துள்ளார். இவரது ஆட்சிக் காலத்தில் கால்நடைகளோடு இடம்பெயர்ந்து கொண்டிருந்த பூஜ கொல்லவார்கள் (வடுகாயர்கள்), மதுரையிலிருந்து தென்திசைக்கு இடம்பெயர்ந்து, விருதுநகர் மாவட்டம் சாத்தூர் தாலுகாவிலுள்ள வேப்பிலைப் பட்டியில் தங்கி, அங்கிருந்து பிற இடங்களுக்குக் குடியேறியுள்ளனர் என்ற செய்தியைப் பெறமுடிகிறது.

 -ஆயர்களின் வாழ்வியல் வரலாறு  சா.கருணாகரன்

இவர்களில் காஞ்சிபுரம், திருவள்ளூர், சென்னை, வேலூர் ஆகிய மாவட்டங்களில் குடியேறியவர்கள் இன்றளவும் பூஜ கொல்ல  என்ற பெயருடனும் மேலும், மதுரை, விருதுநகர், திருநெல்வேலி ஆகிய பகுதிகளில் குடியேறியவர்கள் "வடுகாயர்", "வடுக இடையர்" மற்றும் பூஜகொல்ல போன்ற பெயர்களாலும் வழங்கப்படுகின்றனர். தென் தமிழகத்தில் குடியேறி காலங்கள் பல கடந்துவிட்டபோதும் இன்றளவும் தங்களின் குலதெய்வமான கங்கையம்மனையும், தங்களின் முன்னோனான காட்டமராஜூவையும் கோவில்கள் எழுப்பி வணங்கும் வழக்கத்தை கொண்டிருக்கிறார்கள்.

கல்வெட்டு படம் உபயம்

நன்றி

திரு. ராஜா தென்கரை மஹராஜ பாண்டியன் அவர்கள்  {கடம்பூர் -சொக்கம்பட்டி வாரிசுதாரர் }

கல்வெட்டு விளக்க உரை

நன்றி

திரு- கி.ச.முனிராஜ் வாணாதிராயர்