⭐ கொல்லவார் பாளையம் - ராமபட்டிணம் பாளையப்பட்டு

 

இராமப்பட்டிணம் - பளையப்பட்டு வம்சாவளி:

பொள்ளாச்சி தாலுகா ராமபட்டிணம் சமஸ்தான விவரம்

"கிழக்கில் அரசர்களாக ஆண்டு மேற்கில் பாளையக்காரர்களாகிப் போனார்கள் " என்பது ராமப்பட்டிணம் பாளையக்காரர்களின் வம்சாவளியினருக்கு வழிவழியாக கடத்தப்படும் பழமொழி. இதன்படி பல நூற்றாண்டுகளுக்கு முன்பு இவர்கள் தன்னாட்சி அரசர்களாக இருந்து பின்னாட்களில் பாளையக்காரர்களாக மாறிவிட்டார்கள் என்கிற கருத்தை ராமப்பட்டிண பாளையக்காரர்களின் முன்னோர்கள் வாய்வழி செய்தியாக தெரிவிக்கின்றனர்.

மதுரை சுல்தான்களின் மீது குமார கம்பணர் படையெடுக்கும் ஆரம்பக் காலக்கட்டத்திலேயே ராமப்பட்டிணம் பாளையக்காரர்களின் முன்னோர்கள் ஆச்சிப்பட்டி பகுதியில் தன்னாட்சி அரசர்களாக ஆட்சி செலுத்திக்கொண்டிருந்தனர் என்பது குறிப்பிடத்தக்கது. எனவே ஹோய்சாளர்கள் கொங்கு நாட்டை ஆண்டுக்கொண்டிருந்த தருணத்தில் ஆச்சிப்பட்டி பாளையம் ஏற்பட்டதாக கூறப்படுகிறது. கி.பி.1370ஆம் ஆண்டு குமாரகம்பண உடையார் மதுரையை சுல்தான்களிடம் இருந்து மீட்கும் பொழுது விஜயநகரப் பேரரசின் கீழ் குறுநில அரசாக ஆச்சிப்பட்டி மாற்றப்பட்டது. ஏனெனில் ஆச்சிப்பட்டியில் கோட்டைக்காட்டில் உள்ள கல்யாண வெங்கடேச பெருமாள் (அ) கோட்டை பெருமாள் கோவிலின் பழமையை ஆராய்ந்த ஆய்வாளர்கள் இக்கோவில் எழுப்பட்டு 700 ஆண்டுகள் நிறைவுப்பெற்றுள்ளது என உறுதி செய்கிறார்கள். இதுபோக மற்றுமொரு கருத்தாக, இந்த ஆச்சிப்பட்டி கல்யாண வெங்கடேச பெருமாள் கோவில் 13ஆம் நூற்றாண்டை சார்ந்ததாகவும் தெளிவுப்படுத்தப்பட்டுள்ளது.

 இக்கோவில் கோட்டைக்காடு என்று பெயர்பெற்ற ஆச்சிப்பட்டி பாளையத்தின் கோட்டைக்கு உட்பட்ட கட்டிடங்களில் ஒன்று என்பதால் இக்கோவிலை ஆச்சிப்பட்டி பாளையக்காரர்களோடு ஆய்வாளர்கள் பிணைக்கிறார்கள். எனவே இந்த 700 வருடங்கள் என்பதிலிருந்து கூட்டல் குறைச்சலாக வருடங்களை கழித்துப்பார்த்தாலும் கூட ஆச்சிப்பட்டி அரசு உருவான காலம் என்பது 650வருடங்களுக்கு மேல் என்பது உறுதி. 

ஆச்சிப்பட்டி கல்யாண வெங்கடேச பெருமாள் கோவில்

கோவில் கருடக்கம்பம்

கம்பளத்தாரில் கொல்லவார் சாதியை சேர்ந்த ஆச்சிப்பட்டி பாளையத்தின் முன்னோர் ஒருவர் (பெயர் தெரியவில்லை) வடுக நாட்டிற்கு தெற்காக தமிழக்கத்திற்கு வந்து அனைமலைச் சரிவிற்கு வடக்கே அமைந்துள்ள ஆச்சிப்பட்டி என்கிற ஊரில் வந்திறங்கி அங்கே ஒரு அரசை அமைத்துக்கொண்டு கோட்டை ஒன்றையும் எழுப்பி கவுண்டர் என்கிற பட்டத்தோடு பாளையத்தை ஆண்டுவந்தார்கள்.

கவுண்டர் பட்டம்:-

கவுண்டன் என்பது கொங்குநாட்டில் வழங்கப்படும் சிறப்பு பட்டங்களுள் மிகவும் முக்கியத்துவமானது.

மறுவு = சாமந்தன், சாமுண்டன், காமுண்டன், கவுண்டன்.

க. காமண்ட, கண்ட, தவுட, தமண்ட, கவுண்ட, கவுண்டு, கவுடு, காமுண்டு, காவுண்ட, காவுண்டு, கொண்ட, கோவுண்டு, கௌஉட, கௌண்ட, கௌண்டு, கௌட, கௌடு, கெளவுண்ட; தெ. கௌடே

கவுண்டன், காமுண்டன், காமிண்டன் என்பவை படைத்துறை மறவரின் (போர் வீரர்) பதவிப் பெயர்களாயிருந்து குலப் பெயர்களாக மாற்றப் பட்டவை. இவை எயின்குடி, வேளாண்குடி என்றாற் போன்ற குடிப்பெயராகவோ, குயவர்,மீனவர் என்றாற் போன்ற தொழில்வழி குலப்பெயராகவோ; சேர்ப்பன், குன்றன், பொருப்பன்,மூப்பன் என்றாற் போன்ற குலவழி தலைமக்கள் பெயராகவோ; ஊராளி, நாட்டார் என்றாற் போன்ற ஆட்சிவழி அதிகாரப் பெயராகவோ வழங்கப்படவில்லை. பத்தாம் நூற்றாண்டில் தான் முதன்முதலாக நன்னி காமுண்டன் என்னும் பெயர் கல்வெட்டில் பயின்றுள்ளது. அதற்குமுன் இச்சொல்லாட்சி எங்கும் காணப்படவில்லை. சிற்றுர்த் தலைவர்கள் நாடுமுழுதும் கவுண்டன் என்னும் பெயரால் அழைக்கப்பட வேண்டும் என்று எந்த அரசர் காலத்திலும் ஆணை பிறப்பிக்கப்படவில்லை.

படை மறவர்களுள் சாமன், சாமந்தன், மாசாமந்தன் என்பவை படிப்படியாக உயர்ந்த பதவிகளைக் குறித்தன. பெரும்படைத் தலைவர் மாசாமந்தன் எனப்பட்டான். அவனுக்குக் கீழ் நிலையிலுள்ள அதிகாரி 'சாமந்தன்' எனப்பட்டான். இச்சொல் கன்னட ஆட்சியின் போது காமுண்டன் என்றும்,சோழர் ஆட்சியின் போது சாமுண்டன் என்றும் திரிந்தது. காமுண்டன் நாளடைவில் காவுண்டன், கவுண்டன் எனத் தமிழிலும், கவுடு, கவுட எனத் தெலுங்கு கன்னட மொழிகளிலும் திரிபுற்றது. போர்க்காலத்திய பதவிப்பெயர் நாளடைவில் குலப்பெயராகி விட்டது. வழிவழி போர்மறவராயிருந்தவர் பற்றி, படையாட்சி என்றும் அழைக்கப்பட்டனர். யாழ்ப்பாணத்துப் பண்டார வன்னியனைக் கவுண்டன் எனக் குறிப்பிடவில்லை: உழவர்குடியில் பிறந்த திருநாவுக்கரசர் கவுண்டர் என அறியப்படவில்லை. வேளாளக் குடியினர் பத்தாம் நூற்றாண்டுக்கு முன்பு கவுண்டர் எனக் குறிக்கப்பட்டதில்லை. கன்னட, தெலுங்கு தாக்கம் பெறாத போதிலும் தென் தமிழகத்தில் இச்சொல் குலப்பெயராகவோ, குடிப்பெயராகவோ எப்பொழுதும் ஆளப்படவில்லை.

படைத்துறையில் தலைமை ஏற்றதால் பெற்ற முதலி என்னும் படைத்துறைப் பதவிப்பெயர் நாளடைவில் குலங்குறித்த (சாதி) பெயரானது போல், படைத்துறை பதவிப்பெயரான சாமந்தன் என்பது

சாமந்தன் ⇒ சாமுண்டன் ⇒ காமுண்டன் ⇒ கவுண்டன் எனத் திரிந்திருக்கிறது.

இத்தகைய சிறப்பினைப்பெற்ற கொங்குமண்டலத்து குலப் பட்டத்தைதையே எர்ர கொல்ல குல ராமப்பட்டிணம் பாளையக்காரர் சூட்டிக்கொண்டு அரசாண்டு வந்துள்ளனர் என்பது கூடுதல் சிறப்பு.

The Mysore Tribes and Castes, Vol - 3, 

கௌடா என்னும் கன்னட தலைப்பிற்கு தமிழில் இணையான தலைப்பு கவுண்டர் என்பதாகும். கர்நாடக மாநிலத்தில் கொல்லவார்கள் கௌடா மற்றும் கௌடு பட்டங்களை உடையவர்கள் என்பதாலும், ஹோய்சாளர்களோடு தொடர்புடைய பாளையம் என்பதாலும் இராமபட்டிணம் பாளையக்காரர்களுக்கு இத்தலைப்பு உரியதானது.

திம்மண கவுண்டர்:-

மன்னர் திம்மண கவுண்டர்

திம்மண கவுண்டருக்கு முன்பே அவரது முன்னோர்கள் பலர் பாளையக்காரர்களாக ஆச்சிப்பட்டியை நிறுவி தொடர்ந்து ஆண்டிருந்தாலும் நமக்கு திம்மண கவுண்டர் காலத்தில் இருந்தே ஆதாரங்கள் கிடைக்கப்பெறுகின்றன.

கி.பி 1480 ஆம் ஆண்டுவாக்கில் ஆச்சிப்பட்டியை திம்மண கவுண்டர் ஆட்சி செய்து வந்துள்ளார். இவர் ஆச்சிப்பட்டி கோட்டைக்காடிற்கு உட்பட்ட கல்யாண வெங்கடேச பெருமாள் கோவிலுக்கு பல திருப்பணிகளை செய்துள்ளார்.

திம்மண கவுண்டருடைய சிலையையும் அம்மண கவுண்டருடைய சிலையையும் இன்றளவும் ஆச்சிப்பட்டி கல்யாண வெங்கடேச பெருமாள் கோவிலில் காணலாம்.

அம்மண கவுண்டர்:-

மன்னர் அம்மண கவுண்டர்

திம்மண கவுண்டருக்கு பிறகு ஆச்சிப்பட்டி பாளையத்தை ஆட்சி செய்தவர் அவரின் மகன் அம்மண கவுண்டர். இவர் அம்மணீஸ்வரர் என்கிற சிவபெருமானின் திருவருளால் பிறந்த காரணத்தினால் இவருக்கு அம்மண கவுண்டர் எனப் பெயரிடப்பட்டதாக கூறப்படுகின்றது. 16ம் நூற்றாண்டில் விசுவநாத நாயக்கர் மதுரையின் விஜயநகர ஆளுநராக நியமிக்கப்பட்ட போது ஆச்சிப்பட்டியின் பாளையக்காராக அம்மணக் கவுண்டர் ஆட்சி செய்துக்கொண்டிருந்தார் எனக் குறிப்பிடப்படுகிறது.

மதுரையில் நாயக்கர் ஆட்சி:-

16ம் நூற்றாண்டுக்கு முன்பு வரை விஜயநகரப் பேரரசுக்கு கட்டுப்பட்ட பாண்டிய அரசின் கீழ் கோவை, பொள்ளாச்சி, ஆனைமலைப் பகுதிகள் இருந்துவந்தது. 16ம் நூற்றாண்டிற்கு முற்பகுதியில் வீர சேகர சோழனுக்கும் மதுரையை ஆண்டுவந்த சந்திர சேகர பாண்டியனுக்கும் போர் மூண்டது. வீர சேகர சோழனை வீழ்த்த பேரரசர் கிருஷ்ணதேவராயரின் உதவியை கோரிய போது கிருஷ்ணதேவராயரின் பிரநிதியாக கொட்டியம் நாகம நாயக்கர் விஜயநகர படைகளுடன் வந்த வீர சேகர சோழனை வீழ்த்திவிட்டு அரசை பாண்டியனிடம் ஒப்படைக்காமல் தனே அபகரித்துக்கொண்டார். இதனால் கடுங்கோபங்கொண்ட ராயர் நாகமரின் மகன் விஸ்வநாத நாயக்கரை அனுப்பி அவரது தந்தையை கைது செய்து அழைத்துவருமாறு உத்தரவிட்டார். அதன்படியே நாகம நாயக்கர் கைது செய்து ராயர் முன் நிறுத்தினார் விஸ்வநாத நாயக்கர். விஸ்வநாதரின் விசுவாசத்தை கண்டு மகிழ்ந்த ராயர் மதுரை ராஜ்ஜியத்தை விஸ்வநாத நாயக்கருக்கே கொடுத்து ஆளும் படி உத்தரவிட்டார். கி.பி.1529ஆம் ஆண்டு விஸ்வநாத நாயக்கரின் ஆட்சி ஏற்பட்ட காலத்தில் ராமப்பட்டிணம் பாளையம் மதுரையின் ஆதிகார எல்லைக்குள் வந்த நாள் முதல் மதுரை நாயக்கருக்கு முறையே விதிக்கப்பட்ட வரி செலுத்திக்கொண்டு ராமபட்டிணம் பாளையக்காரர்கள் ஆண்டு வந்தனர்.  

ஆச்சிப்பட்டியில் இருந்து ராமபட்டிணத்திற்கு செல்லுதல்:-

ராமப்பட்டிணம்

அதுவரை ஆச்சிப்பட்டியில் இருந்த பாளையக்காரர்கள் கி.பி.15ம் நூற்றாண்டின் இறுதியில் அல்லது கி.பி.16ம் நூற்றாண்டின் துவக்கத்தில் தங்களது பாளையத்தை ராமபட்டிணத்திற்கு மாற்றியதாக தெரிகிறது.

இவ்வாறு பாளையக்காரர்கள் ஆச்சிப்பட்டியில் இருந்து ராமப்பட்டிணத்திற்கு மேற்கொண்ட இடப்பெயர்வுக்கு இரு காரணங்கள் கூறப்படுகின்றன அவைகள்

காரணம் 1:-

அரண்மனையில் ஒரு முறை வேல் விழுந்து பலத்தக் காயம் ஏற்பட்டு குழந்தை ஒன்று பலியாகிவிட்ட காரணத்தினால், அபசகுணம் கருதி பாளைக்காரர்கள் ஆச்சிப்பட்டியை விட்டுவிட்டு ராமபட்டிணத்திற்கு சென்றுவிட்டதாக ராமபட்டணம் ஜமீன் முன்னோர் வழி தகவலாக சொல்லப்படுகிறது.

காரணம் 2:-

ஆச்சிப்பட்டி பாளையத்தின் ஆட்சிப்பகுதியில் பெரும் போர் ஒன்று நடைப்பெற்றதாகவும் இதன் விளைவாக ஆச்சிப்பட்டியில் இருந்த கோட்டை கொத்தளங்களும், சிறைச்சாலையும் அருகிலிருந்த வெங்கடேச பெருமாள் கோவிலும் இடிக்கப்பட்டதாக கூறுகிறார்கள். இதற்கு சான்றாக ஆச்சிப்பட்டி கோட்டை சுவடற்று போய் வெறும் அஸ்திவாரம் மட்டுமே இருப்பதையும், மேலும் பழைய வெங்கடேச பெருமாள் கோவில் இடிப்பட்டதற்கு ஆதாரமாக கோவில் சன்னிதிக்கு முன்பிருக்க வேண்டிய கருடக்கம்பம்  பல ஆடிகள் தொலைவில் உள்ளதையும் கூறலாம். தற்போதுள்ள கோவில் கட்டிடத்திற்கும் கருடகம்பத்திற்கும் இடையில் பழைய கோவிலின் அஸ்திவார கட்டுமான எச்சங்கள் இன்றளவும் புதையுண்டு கிடக்கின்றன. இப்பழையக்கோவில் இடிப்பட்ட பிறகு பழைய கட்டிடத்திற்கு பின்பகுதியில் புதியக்கோவில் கட்டப்பட்டு அங்கே மூலவர் பிரதிஸ்டை செய்து இடிப்பட்ட கோவிலின் எச்சமாக இருந்த அந்த கருடக்கம்பத்தை அப்படியே விட்டுவிட்டார்கள். இக்காரணங்களை வைத்து போர் யுத்தங்கள் முதலான விரும்பத்தாகாத மனக்கசப்பின் காரணமாகவே பாளைக்காரர்கள் ஆச்சிப்பட்டியில் இருந்து ராமப்பட்டிணத்திற்கு குடிப்பெயர்ந்ததாகவும் குறிப்பிடப்படுகிறது.

ராமப்பட்டிணம் பெயர் காரணம்:-

ராமப்பட்டிணம் ஸ்ரீராமபிரான் கோவில்

மேற்கண்ட காரணங்களில் ஒன்றால் பாளையம் ஆச்சிப்பட்டியில் இருந்து வேறொரு ஊருக்கு பாளைய நிர்வாகத்தை ஆச்சிப்பட்டி பாளைக்காரர்கள் மாற்றினர். அவ்வூரை சீர்ப் படுத்தி அதற்கு தங்களின் இஷ்ட தெய்வமான ராமபிரானின் பெயரினைக்கொண்டு "ராமப்பட்டிணம்" என பெயரிட்டு அங்கு ஒரு ராமர் கோவிலையும் கட்டுவித்து ஆட்சி புரியத்துவங்கினர் பாளையக்காரர்கள். 

மைசூர் சாம்ராஜ்ஜியத்தின் கீழ் ராமப்பட்டிணம்:-

மதுரையை மங்கம்மாள் ஆண்டுவந்த காலத்தில் மைசூர் சிக்கதேவராய உடையார் மதுரையின் மீது படையெடுத்து மதுரை ராஜ்ஜியத்தில் சேலம் மற்று கோயம்பத்தூர் மண்டலங்களை கைப்பற்றினார். இதன் விளைவாக மைசூர் அரசின் கீழ் ராமபட்டிணம் பாளையம் சென்றது. பிறகு ஹைதர் அலி, திப்பு சுல்தான் ஆட்சிக்காலம் வரை ராமப்பட்டிணம் பாளையம் மைசூருக்கு கட்டிப்பட்டு மைசூர் அரண்மனைக்கு வரி செலுத்திக்கொண்டு வந்தது.

பிரிட்டிஷ் அரசாங்கத்தின் கீழ் ராமப்பட்டிணம்:-

கி.பி.1799ம் ஆண்டு ஆங்கலேய அரசால் திப்பு சுல்தான் வீழ்தப்பட்டு ஸ்ரீரங்கப்பட்டிண அரசு முடிவிற்கு கொண்டுவரப்பட்ட பின்னர். ராமப்பட்டிணம் பாளையம் கும்பிணியர்களின் கட்டுப்பாட்டிற்குள் வந்தது. 

பிரிட்டிஷாருக்கு எதிரான கிளர்ச்சியில் ராமப்பட்டிணம் :

கிளர்ச்சியில் பங்கேற்ற அயோதரிப்பட்டிணம்

பிரிட்டிஷாருக்கு எதிராக ஒரு மாபெரும் கூட்டணியை அமைப்பதில் விருப்பாட்சி கோபால நாயக்கர் எடுத்த முயற்சி சுதந்திரத்திற்காக ஏங்கிக்கொண்டிருந்த பல பாளையக்காரர்கள் மற்றும் பிற குடியிருப்பாளர்களின் கவனத்தை ஈர்த்தது. மேலும் கோபால நாயக்கர் தனது தூதர்களை ஆங்கிலேய அரசின் மீது அதிருப்தியில் இருந்த திண்டுக்கல், மனப்பாரை, கள்ளர்நாடு, கோவை மற்றும் சேலம் ஆகிய பகுதிகளுக்கு அனுப்பிவைத்தார். 

1797 இல் மனப்பாரையின் லட்சுமி நாயக்கர் மற்றும் தளி எத்துல நாயக்கருடன் கோபால நாயக்கர் ஒரு நெருக்கமான கூட்டணியை ஏற்படுத்திக்கொண்டார். இது திண்டிக்கல் கிளரச்சி கூட்டமைப்பின் கருவை உருவாக்கியது. 

இப்பாளையக்காரர்கள் கிழக்கிந்திய கம்பெனியின் அதிகாரத்தை எதிர்த்துப் போராடவும், ஒருவருக்கொருவர் தங்கள் போராட்டத்தில் உதவவும் முடிவு செய்தனர், இதன் தொடர்ச்சியாக கோபால நாயக்கர் சோம்நாத் பிள்ளையை ஒரு நிலையான தகவல் தொடர்பு நோக்கத்திற்காக தளி பாளையத்திற்கு தனது பிரதிநிதியாக அனுப்பிவைத்தார்.

கும்பினியார் அரசுக்கு எதிராக எத்துல நாயக்கரின் நிகழ்வில் பங்குபெற, மங்கலம் பாளையக்காரர் தளிக்கு வருகைப்புரிந்து கூட்டணியில் சேர ஒப்புக்கொண்டார்.

அவர்களின் தொடர்ச்சியான மற்றும் உறுதியான முயற்சிகளின் விளைவாக பாளையக்காரர்களும் மற்ற பிராந்தியங்களும் கும்பினி அரசை எதிர்க்கும் தங்களின் பொதுவான நோக்கத்திற்காக அணித்திரண்டனர். 

அவர்களில் தியோதானபட்டியைச் சேர்ந்த பூஜாரி நாயக்கரும் ஒருவர்.

மேலும், தாராபுரம், காங்கேயம், கொலம்பம், சங்ககிரி மற்றும் கரூர் ஆகிய பாளையங்களின் பாளையக்காரர்களும்,

திண்டுக்கல்லில் கன்னிவாடி பாளையக்காரரும், ரத்னகிரி மற்றும் நத்தத்தின் தலைவர்கள் மனப்பாரையிலும். 

பெரியப்பட்டி, மெட்ராத்தி, மைவாடி, தொண்டமுத்தூர், துங்காவி, அயோத்தரிப்பட்டி, வேடப்பட்டி மற்றும் சோமன்துரை அதைப் பின்பற்றி கூட்டணியில் இணைந்து தீபகற்ப கூட்டணியை வழுப்படுத்திக்கொண்டு வந்தனர்.

1801ஆம் ஆண்டில் விருப்பாட்சி கோபால நாயக்கர் மற்றும் தளி எத்துலப்ப நாயக்கர் ஆகியோர் கும்பினியர்களுக்கு எதிராக போராட ஒரு மாபெரும் கூட்டிணைப்பை எற்படுத்தினர். அவற்றுள் அப்போதைய கோவை மாவட்ட பாளையக்காரர்களாக இருந்த

1, மெட்டராத்தி 

2, மைவாடி 

3, தொண்டாமுத்தூர் 

4, துங்காவி

5, அயோதரிப்பட்டி (ராமப்பட்டிணம்)

6, வேடப்பட்டி

7, சோமன்துரை

8, மங்கலம்

9, பெரியப்பட்டி 

ஆகிய பாளையங்களின் பாளையக்காரர்கள் தங்களின் ஆட்சிக்கு உட்பட்ட பாளையங்களின் கிளர்ச்சியாளர்களுக்கும், தனது ஆதரவாளர்களுக்கும் தலைமை தாங்கினர். இதில் ராமப்பட்டிணம் பாளையக்காரர் ராமப்பட்டிணம் பாளையத்தின் சுற்று வட்டப் பகுதிகளுக்கு தலைமையேற்றார்.

தண்டனையின் அச்சுறுத்தலின் கீழ் வரி செலுத்துவதற்கும், ஆங்கிலேயே கிழக்கிந்திய கம்பெனிக்கு பாளையக்காரர்களின் உதவியை நீட்டிப்பதற்கும் எதிராக பொதுமக்களை இக்கூட்டமைப்பினர் எச்சரித்தனர்.

இக்கூட்டமைப்பு தளியில் கூடி ஒரு தீர்மானம் செய்து ஜனவரி 31ம் நாளில் விருப்பாட்சிக்கு அருகில் கும்பினி அரசால் அமைக்கப்பட்டிருந்த நிர்வாக அலுவலர்களை தாக்கி அந்த கும்பிணி நிர்வாக அலுவலகத்தை (கட்சேரி) அழித்தனர் மற்றும் அங்கிருந்த சிப்பாய்களையும் விரட்டியடித்தனர். இவ்வாறாக பல பலத்தருணங்களில் விருப்பாட்சி கோபால நாயக்கருக்கும், தளி எத்துலப்ப நாயக்கருக்கும் கும்பினியருக்கு எதிரான விடுதலைப்போரில் பெரிதும் உதவிய கொங்கு பாளையக்காரர்களில் ராமப்பட்டினம் பாளையக்காரரும் மிகுந் இறுதியில் விருப்பாட்சி கோபால நாயக்கர் தூக்கிலிடப்பட்டதாலும், கிளர்ச்சி செய்த பாளையக்காரர்கள் ஒடுகப்பட்ட காரணத்தினாலும் தென்னிந்திய தீபகற்ப கூட்டமைப்பு தோல்வியடைந்தப் பின்னர் வேறு வழியின்றி ராமப்பட்டிணம் பாளையக்காரர்கள் ஆங்கிலேயர்களுக்கு வரி செலுத்த ஒப்புக்கொண்டு ஜமீன்தார்களாக ஆங்கிலேயருக்கு கட்டுப்பட்டு ஜமீனை ஆண்டு வந்தனர்.

இக்காலக்கட்டத்திற்கு பிறகு தான் ஆங்கிலேய அரசால் பாளையக்காரர்கள் அனைவரும் ஜமீன்தார்களாக மாற்றப்பட்டனர்.

நந்தகோபால எர்ரைய கவுண்டர்:-

19ம் நூற்றாண்டில் ராமப்பட்டிணத்தை ஆண்டவரும் மலையாண்டி எர்ரைய கவுண்டரின் மகனுமான ஜமீன்தார் நந்தகோபால எர்ரப்ப கவுண்டர் அவர்கள் மிகச்சிறந்த கல்விமானாக விளங்கினார். தனது அரண்மனை நாடி வந்த புலவர்களுக்கும், கவிஞர்களுக்கும் தாராளமாக செல்வங்களை வாரி வழங்கிய தயாள குணம் வாய்க்கப்பெற்றவர். இவரது கொடைத்தன்மையை போற்றி இவரது சமக்காலத்தில் வாழ்ந்த புலவரான மாம்பழக்கவி சிங்கநாவலர் பாடல்கள் இயற்றி ஜமீன்தாரை சிறப்பித்துள்ளார்.

நந்தகோபால எர்ரைய கவுண்டரின் திருமண நிகழ்வு :

பாரம்பரிய நடனமான பாரதநாட்டியம், வானவேடிக்கை பட்டாசு காட்சி நிகழ்ச்சிகள் மற்றும் பலவேறு இசைக்கருவிகளை கொண்டு நிகழ்த்தப்பட்ட இசை நிகழ்ச்சிகளை உள்ளடக்கி மிகப் பிரம்மாண்டமாக நடைப்பெற்ற ராமப்பட்டினம் ஜமீன்தார் நந்தகோபால எர்ரைய கவுண்டரின் திருமண விழாவின் மகத்துவம் குறித்து மாம்பழக்கவி சிங்க நாவலர் தனது பாடலில் அழகுற விளக்கியுள்ளார்.

ஜமீந்தாரிணி குமார அம்மாள்:-

       இராமபட்டணம் ஜமீனைச் சேர்ந்தவர்கள், தம் வருவாயில் பல்வேறு கொடைகள் நல்கியுள்ளனர். 19ம் நூற்றாண்டின் முற்பகுதியில் ஜமீன் குடிவழியில், ஒரு கட்டத்தில், மன்னர் மலையாண்டி எர்ரப்ப கவுண்டர் எதிர்பாராத வகையில் இறந்துவிட்ட காரணத்தினால், பட்டத்துக்கு வந்தவர் சிறுவனாய் அமையவே, சிறுவனின் தாயாரான குமார அம்மாள் என்பவர் ஜமீந்தாரிணியாகப் பொறுப்பேற்றார். இவர் வீரமிக்க பெண்மணி ஆவர். தம் ஆட்சிக்குக்கீழ் உள்ள ஊர்ப்பகுதிகளுக்குக் குதிரைமீது பயணம் சென்று நாடு காக்கும் பணியாற்றியுள்ளார் என்று அறிகிறோம். இவர், பாலக்காடு சாலையில் நிழல் மரங்கள் நட்டுவித்துள்ளார். ஆச்சிப்பட்டி கோட்டைப்பகுதியில் இருந்த பெருமாள் கோயில், இராமபட்டணத்து ஜமீன் குடியினர் வந்து வழிபடும் கோயிலாக அமைந்தது.

குமரகுருபர இராமநாத மலையாண்டி எர்ரப்ப கவுண்டர்:-

காலம்: க.பி.1909 - கி.பி.1973

பட்டாபிஷேகத்தின் போது ஜமீன்தார்
ஸ்ரீ குமரகுருபர ராமநாத மலையாண்டி
எர்ரப்ப கவுண்டர்

கோர்ட் ஆப் வார்ட்ஸ் (Court of Wards) :

 நந்தகோபால எர்ரப்ப கவுண்டர் இறந்தபோது அவரின் மகனான குமரகுருபர ராமநாத மலையாண்டி எர்ரப்ப கவுண்டர் 18 வயதை அடையாத 10 வயது சிறுவனாக இருந்த காரணத்தினால் ஆங்கிலேய அரசின் சட்டப்படி 1919 முதல் 10 நவம்பர் 1930 வரை கோர்ட் ஆப் வார்ட்ஸ் என்கிற சட்டப்பூர்வ அமைப்பு ராமப்பட்டிணம் பாளையத்தை நிர்வகித்தது. இவ்வமைப்பு நிதிமன்றத்தின் சார்பாக குமரகுருபர ராமநாத எர்ரப்ப கவுண்டருக்கு சிறப்பான கல்வியை கொடுத்தது. அவர் தனது கல்லூரிப் படிப்பை பெங்களூரின் புகழ்பெற்ற புனித ஜோசப் கல்லூரியில் (St.Joseph's College) முடித்தார். 

கோர்ட் ஆப் வார்ட்ஸ் (Court of Wards)

 குமரகுருபர எர்ரப்ப கவுண்டர் 18வயதைக் அடைந்தவுடன் அவரது அறிவுத்திறன்களை சோதித்து ஜமீனை ஆள அனைத்து தகுதியையும் பெற்றிருந்த காரணத்தினால் அவருக்கு மன்னராக முடிசூட்டிவைத்து சேமிப்புத் தொகையாக ரூபாய் 80,000 தொகையையும் அவருக்கு அளித்து எவ்வித பிணைகளும் இன்றி ஜமீனை அவருக்கு திருப்பிக் கொடுத்தது. அக்காலக்கட்டத்தில் ராமப்பட்டிணம் ஜமீனின் ஆண்டு வருமானம் லட்சம் ரூபாயாக இருந்தது என்பதும் குறிப்பிடத்தக்கது.

ஜமீன்தாராக குமரகுருபர எர்ரப்ப கவுண்டர் :

  10 நவம்பர் 1930 நாள் துவங்கி ராமபட்டிணம் ஜமீனின் ஜமீன்தாராக பதவியேற்று சிறப்பாக ஆட்சி செய்தார்.

மேலும், ராமப்பட்டிணம் ஜமீனின் இறுதி ஜமீந்தாரும் குமரகுருபர இராமநாத மலையாண்டி எர்ரப்ப கவுண்டராகிய இவரே ஆவார். இவர் இராமபட்டணத்திலிருந்து கோவைக்குக் குடி பெயர்ந்தார். இவர், கோவை "காரனேஷன்" பூங்கா உருவாவதற்குக் கொடை அளித்துள்ளார். இவர், ஒரு ‘மோட்டர் கார்ப் பிரியர்’ எனத்தெரியவருகிறது. இவர், தம் காலத்தில் புழங்கிய "ப்யூயிக்", "ஹட்சன்", "கெடிலாக்", "டாட்ஜ்", "லாண்ட் ரோவர்" ஆகிய மகிழுந்துகளில் (Car) திம்பம் பகுதியில் வேட்டைக்குச் செல்வதுண்டு வேட்டையாடுவதில் மிகுந்த ஆர்வமும், நுட்பமான அறிவும் கொண்டவர். இவர், பல ஆண்டுகள் ஒரு யானையை வளர்த்துவந்தார் என்றும் கூறப்படுகிறது. ஜமீன்தார் குமரகுருபர எர்ரப்ப கவுண்டர் சமூக செயல்பாடுகளில் மிருந்த ஆர்வம் கொண்டவராகவும் விளங்கினார். அவர் பல சமூக மற்றும் குடிமை ஆமைப்புகளில் உறுப்பினராக செயல்பட்டார். அதில் ஒன்றாக அவர் தனது 23 வயதிலிருந்தே மாவட்ட வாரிய (Member Of District Board) உறுப்பினராக இருந்தார்.  

தம் வாழ்நாளின் இறுதிப்பகுதியில் ஆன்மிகத்தில் மிகுதியும் ஈடுபட்ட இவர், ஒரு துறவி போல் வாழ்ந்தவர். ஆங்கிலப் புலமை பெற்ற இவர், வேதாந்தம் பற்றிப் பல நூல்களை ஆங்கிலத்தில் இயற்றியுள்ளார். அவற்றுள் THE REVELATIONS OF VEDANTA (வேதாந்தத்தின் வெளிப்பாடுகள்) என்கிற நூலும் ஒன்று என்பது குறிப்பிடத்தக்கது. இவர் வழி வந்தவரே (இவரின் மகன் ஆனந்தராஜா எர்ரப்ப கவுண்டரின் பேரன் திரு. S.K.நந்தகுமார் அவர்கள்).

எர்ரகொல்ல மகாஜன சங்கம் சங்கத்தின் நிறுவனத் தலைவர்:-

கி.பி 1944 ஆம் ஆண்டு ராமபட்டினம் ஜமீன்தார் "திரு. குமரகுருபர ராமநாத மலையாண்டி எர்ரப்ப கவுண்டர்" தலைவராக வும் தியாகி இராமசாமி அவர்கள் செயலாளராகவும் கொண்டு எர்ரகொல்ல மகாஜன சங்கம் (ERRA GOLLA MAHAJANA SANGAM) ஆரம்பிக்கபட்டது.

மைவாடி பாளையத்தை நிர்வகித்த ராமப்பட்டிணம் ஜமீன்:-

மைவாடி (மைலாடி) பாளையம் முதலில் சின்னம்ம நாயக்கர் வம்சாவழியினரால் ஆளப்பட்டு வந்தது இப்பாளையம் ஆங்கிலேயர்களின் மேலாண்மைக்கு கட்டுப்படாமலும் அரசுக்கு வரித்தொகையை சரிவர செலுத்தாமலும் இருந்த காரணத்தினால் ஆங்கிலேய அரசு இப்பாளையத்தை ஜப்தி செய்தது.

 இக்காலக்கட்டத்தில் ராமப்பட்டிணம் ஜமீன்தார்கள் மைவாடி பாளையத்தை குத்தகைக்கு எடுத்து சில காலம் நிர்வகித்தனர். பிறகு இப்பபாளையம் ஆங்கிலேய அரசால் ஏலம் விடப்பட்டு அது ஊத்துக்குளி பாளையக்காரரால் வாங்கப்பட்டு அவர்கள் தங்களின் வம்சாவழியில் ஒருவரை மைவாடிக்கு பாளையக்காரராக நியமித்தனர்.

ராமப்பட்டிணம் ஜமீன்தாரியின் எல்லைகள்:-

கொங்குநாட்டுப் பட்டக்காரர்களும் பாளையக்காரர்களும்
- புலவர்.சே.இராசு

ஆச்சிப்பட்டி தலைநகராக இருந்தபோது தென்கிழக்கே உடுமலை வட்டம் கோமங்கலம்புதூர் பெருமாள்மலை வரையிலும், மேற்கே கேரள மாநிலம் பாலக்காடு மாவட்டம் பள்ளசேனா பகவதியம்மன் கோயில் வரை இவர்கள் நிர்வாகத்தில் இருந்தது. இராமபட்டிணம் ஜமீனுக்கு உட்பட்டுப் பிற்காலத்தில் ஆச்சிப்பட்டி, இராமபட்டணம், சலத்தூர், கோமங்கலம், கோபாலபுரம் பகுதிகள் இருந்தன.

இராமபட்டணம் வணிகச் சிறப்புள்ள ஊராக விளங்கியுள்ளது. அருகில் வணிகக் குழுவின் தங்கும் இடமான தாவளம் இருந்துள்ளது. இன்றும் தாவளம் ஊர்ப்பெயராக விளக்குகிறது. இராமபட்டணம் ஒரு வணிகப் பெருவழியில் அமைந்திருந்தது. "பட்டணம்" என்ற பெயரே வணிகரின் இருப்பிடமாகிய ஊரைக் குறிக்கும்.

கிழக்கிந்தியக்கம்பெனி ஆட்சிக்காலத்தில் பாளைய முறை நீக்கப்பட்டு, ஜமீன்தார்கள் நியமிக்கப்பட்டனர். இராமபட்டணம் ஜமீன்தார்களின் எல்லைகள் சுருங்கின. வடகிழக்கே ஆர்.பொன்னாபுரம் முதல் மேற்கில் பாலக்காடு மாவட்டம் பள்ளசேனா மீன்குளத்திப் பகவதியம்மன் கோயில் ஊர் வரையிலும், தென்மேற்கே மணக்கடவு வரையிலும் ஜமீன் எல்லையாக நிர்ணயிக்கப்பட்டது.

மதராஸ் அரசுக்கும், கொச்சி அரசுக்கும் வரிசெலுத்துவதை
கணக்குப்படுத்த ஜமீனால் உபயோகிக்கப்பட்ட ஆவணம்

பொள்ளாச்சிக்கு உட்பட்ட வரியை மதராஸ் மாநிலத்திற்கும், பாலக்காட்டுப் பகுதி வரியைக் கொச்சி அரசுக்கும் இராமபட்டணம் ஜமீன்தார்கள் செலுத்தி வந்தார்கள்

கொங்குநாட்டுப் பட்டக்காரர்களும் பாளையக்காரர்களும்

புலவர்.சே.இராசு

ராமப்பட்டிணம் ஜமீனின் வரைப்படம்
Image Courtesy - S.K.Nandha Kumar

ஆங்கிலேயர் கால எல்லை கிராமங்கள்:

1, ராமப்பட்டிணம்

2, மண்ணூர்

3, பொண்ணாபுரம்

* ராமப்பட்டினம் ஜமீனின் தென்மேற்கு எல்லை மணத்துக்கடவு

* வட கிழக்கே 9.6கிலோமீட்டர் தொலைவில் பொண்ணாபுரம் கிராமம்

* மேற்கு எல்லை பாலக்காட்டின் பள்ளசேனா, மீன்குளம், வடவன்னூர் ஆகிய பகுதிகளை உள்ளடக்கியதாக இருந்துள்ளது

* வடக்கு எல்லை பற்றிய விவரம் தெரியவில்லை

ஆங்கிலேயர்கள் ஆட்சியில் ஜமீன் சொலுத்திய வரித்தொகை:-

ஜமீன் செலுத்திய வரித்தொகை

வரித்தொகை:

* 22,190 ஆயிரம் ரூபாய் 11 அனா காசுகள் (ஆங்கிலேய மதராஸ் அரசிற்கு உட்பட்ட ராமபட்டிணம் ஜமீன் பகுதிகளுக்கு மட்டும்)

* கொச்சி சமஸ்தானத்திற்கு செலுத்திய வரித்தொகை குறித்த விபரங்கள் அறியப்படவில்லை.

ராமப்பட்டிணம் பாளையக்காரர்களின் சாதி விவரம்:-

ராமப்பட்டிணம் பாளையப்பட்டின்
சாதி விவரங்கள்

பட்டம்  : எர்ரப்ப கவுண்டர்

சாதி   : எர்ர கொல்லவார் இராஜகம்பளம்

குலம்  : போசல (போசளவார்)

கொங்கு மண்டல எர்ர கொல்லவார், போசளர் குலம்
நூல் : தொட்டிய நாயக்கர் (கொல்லவாரு) - M.R.இராமசாமி

இராமப்பட்டிணம் பாளையக்காரர்கள் வம்சாவழிகள்:-

* இம்மடி எர்ரப்ப கவுண்டர்

* திம்மண கவுண்டர்

* அம்மண கவுண்டர்

* மலையாண்டி எர்ரைய கவுண்டர்

* நந்தகோபால எர்ரைய கவுண்டர்

* மலையாண்டி எர்ரப்ப கவுண்டர்

* குமார அம்மாள்

* நந்தகோபால எர்ரப்ப கவுண்டர்

* குமர குருபர ராமநாத மலையாண்டி எர்ரப்ப கவுண்டர்

ஆச்சிப்பட்டி / ராமபட்டிணம் பாளைய முன்னோர் நினைவுச் சின்னங்கள்:-

ராமப்பட்டிணம் பாளையக்காரர்கள் தங்களின் முன்னோர்கள் மறைந்த பிறகு அவர்களுக்கு நடுகல் அல்லது நினைவுக்கல் வைப்பதை வழக்கமாகக் கொண்டிருந்திருக்கிறார்கள். அவைகளில் சிலவற்றை கீழே காணலாம்.

ஆச்சிப்பட்டி பாளைய முன்னோர் நினைவுக்கல்

காலம் :  16ம் நூற்றாண்டு

இடம் :  ஆச்சிப்பட்டி கல்யாண வெங்கடேச பெருமாள் கோவில்

ஆச்சிப்பட்டி பாளைய முன்னோர் நினைவுக்கல்

காலம் :  16ம் நூற்றாண்டு

இடம் :  ஆச்சிப்பட்டி கல்யாண வெங்கடேச பெருமாள் கோவில்

தனது இரு மனைவிகளுடன் ராமப்பட்டிணம் பாளையக்காரர்

காலம் :  17ம் நூற்றாண்டு

இடம் :  ராமப்பட்டிணம் அரண்மனைக்கு எதிர்புறம் நந்தவனக்காடு

ராமப்பட்டிணம் பாளையக்காரர்கள் வணங்கும் 
புலியைக் கொல்லும் அரசன் சிலை

காலம் :  அறியப்படவில்லை

இடம் :  ராமப்பட்டிணம் அரண்மனைக்கு எதிர்புறம் நந்தவனக்காடு

ராமப்பட்டிணம் பாளையக்காரர்கள் செய்த கொடைகள்:-

இறைப்பணிகள்:-

இராமப்பட்டிணம் பாளையக்காரர்கள் அமைத்த கோவில்கள் :

1, கல்யாண வெங்கடேச பெருமாள் கோவில் - ஆச்சிப்பட்டி, கோட்டைக்காடு

2, ராமபட்டிணத்திற்கு அருகில் தங்களது ஆட்சிக்குட்பட்ட இடத்தில் கூத்தாண்டவர் கோவில்

3, அம்மணீஸ்வரர் கோவில், குரும்பப் பாளையம்

4, கோதண்டராமர் கோவில் - ராமபட்டிணம்

5, அரண்மனை பகவதி அம்மன் கோவில்

6, விநாயகர் கோவில் - தட்டாங்குளம், பழனி 

அம்மணீஸ்வரர் கோவில்

அம்மணீஸ்வரர்

அம்மணீஸ்வரர் கோவிலில் உள்ள நினைவுக்கல்

அம்மணீஸ்வரர் கோவிலில் உள்ள நினைவுக்கல்

ஆலய அறங்காவலர்களாக :

ராமபட்டிணம் ஜமீன்தார்கள் பதினோரு கோவில்களுக்கு அறங்காவலர்களாக உள்ளனர் அவற்றுள் :

1, விநாயகர் கோவில்

2, ராமர் கோவில்

3, மஹாகாளியம்மன் கோவில்

4, காளியம்மன் கோவில்

இறைக்கொடைகள் :

1, புரட்டாசி சனிக்கிழமையில் விஷ்ணுவின் அவதாரமான ஸ்ரீராமபிரானுக்கு வேத மந்திரங்கள் முழங்க திருத்தேரில் (சாப்பரம்) பட்டிண பிரவேசம் செய்விக்கின்றனர்.

2, திருச்செந்தூர் சுப்பிரமண்ய சுவாமி கோவிலுக்கு மரகத ஆபரணத்தை இறைக்கொடையாக வழங்கியுள்ளனர். இவ்வாபரணத்தை இன்றளவும் தமிழ் மாதமான மாசி மாதம் முழுவதும் இறைவனுக்கு அணிவிக்கின்றார்கள்.

3, திருச்செந்தூர் சுப்பிரமண்ய சுவாமி கோவிலுக்கு யானை ஒன்றையும் கொடையாக வழங்கியுள்ளனர்.

4, பொள்ளாச்சி அருள்மிகு சுப்பிரமணியர் கோவிலுக்கு பொள்ளாச்சி சங்கம்பா ளயத்தில் 100 ஏக்கர் நிலமும், ஊஞ்சவேலாம்பட்டியில் 80 ஏக்கர் நிலமும் தானமாக கொடுக்கப்பட்டுள்ளது.

5, பொள்ளாச்சி கரி வரதராஜா பெருமாள் கோவிலுக்கு பொள்ளாச்சி நகரில் இருபது ஏக்கர் நிலம் கொடுக்கப்பட்டுள்ளது.

பொள்ளாச்சி சுப்பிரமணியசுவாமி கோவில்

பொள்ளாச்சி கரி வரதராஜ பெருமாள் கோவில்

ராமபட்டிணம் பாளையக்காரர்கள் பொதுமக்களுக்கு செய்த தருமங்கள்:-

சமூகநீதிக் கொடை :

1, குமர குருபர ராமநாத மலையாண்டி எர்ரப்ப கவுண்டரின் மகனான ஆனந்த ராஜா எர்ரப்ப கவுண்டர் அவர்கள் சமூகத்தில் ஒடுக்கப்பட்ட மக்களுக்கான வீடுகளை கட்டித்தர 5 ஏக்கர் நிலத்தினை மானியமாக கொடுத்து உதவினார். இக்குடியிருப்புக்கு கலைஞர் நகர் எனப்பெயரிடப்பட்டது.

இராமபட்டிணம் கலைஞர் நகர்

மருத்துவமனை :

1, இந்தியா சுதந்திரம் பெற்றப்பிறகான காலக்கட்டத்தில் ராமபட்டிணம் ஜமீன் வாரிசு 5 ஏக்கர் நிலத்தை முதல்நிலை ஆரம்ப சுகாதார நிலையம் அமைக்க மானியமாக வழங்கினார். மேலும், அந்த முதல்நிலை ஆரம்ப சுகாதார நிலையம் மற்றும் மருத்துவமனை கட்டிடம் கட்டப்படும் வரை அவை ராமப்பட்டிணம் அரண்மனையிலேயே செயல்படவும் வழிவகை செய்துக்கொடுத்தார்.

கல்விக்கூடம் :

 1, ராமபட்டிணம் பகுதி மக்களின் கல்விக்காக ராமப்பட்டிணம் ஜமீன் சார்பாக 5 ஏக்கர் நிலத்தை அரசுக்கு இனாமாக கொடுத்து அங்கே அரசுப்பள்ளி ஏற்பட வழிவகுத்தனர்.

அங்காடி :

1, பொள்ளாச்சி அருகே தற்போதுள்ள மீன்கரை சலையில் மார்க்கெட் அமைக்க சுமார் 30 ஏக்கர் நிலத்தை தானமாக ராமப்பட்டிணம் ஜமீன்தார்கள் வழங்கியிருக்கிறார்கள்.

பூங்கா :

வ.உ.சி.உயிரியல் பூங்காவில் உள்ள கல்வெட்டு

தற்போது கோவையில் நில அடையாளக் கட்டமைப்புகளில் ஒன்றாக கோயம்புத்தூர் மாநகராட்சியினால் பராமரிக்கப்படும் வ.உ.சி. பூங்கா (சுதந்திர போராளி, வ.உ.சிதம்பரம் பிள்ளையின் பெயரிடப்பட்டது).

பிரிட்டனின் ஐந்தாம் ஜார்ஜ் மன்னரின் முடிசூட்டு விழாவை நினைவுகூரும் வகையில் இந்த பூங்கா 1912 இல் உருவாக்கப்பட்டது. எனவே இதற்கு முடிசூட்டு பூங்கா (Coronation Park) என்று அழைக்கப்பட்டது மற்றும் இப்பூங்கா பொது பங்களிப்புடன் உருவாக்கப்பட்டது. பின்னர் 1937 ஆம் ஆண்டில் பூங்காவில் ஒரு நினைவு கட்டிடமும் திறக்கப்பட்டது, அழகுற கட்டிமுடிக்கப்பட்ட இப்பூங்கா சுமார் 45 பேரின் பங்களிப்புகளைப் பெற்று உருவானதாக இருந்தது. மேலும், இப்பூங்காவிற்கு கொடையளித்த 45 கொடையாளர்களில் கோயம்புத்தூர் பிராந்தியத்தின் ஜமீன்தார்களும் அடங்குவர். அவர்களின் விவரங்கள் கீழே பட்டியலிடப்பட்டுள்ளன.

எண்	ஜமீன்தாரி பெயர்	ஜமீன்தார் பெயர்	கொடையளித்த தொகை
1	சமத்தூர்	V.S.R.வாணவராயர்	1250 ரூபாய்
2	ஊத்துக்குளி	திவான் பகதூர் M.N.கலிங்கராயர்	1000 ரூபாய்
3	புரவிபாளையம்	மன்றாடியார்	1000 ரூபாய்
4	ராமப்பட்டிணம்	M.N.எர்ரப்ப கவுண்டர்	500 ரூபாய்
5	ஊத்துக்குளி	T.V.R.கலிங்கராயர் (தனிப்பட்ட முறையில்)	300 ரூபாய்

வ.உ.சி. உயிரியல் பூங்கா

 இராமப்பட்டிணம் ஜமீன் கட்டுப்பாட்டில் உள்ள கோவில்கள்:-

கல்யாண பிரசண்ண வெங்கடேச பெருமாள் கோவில்:-

ஆச்சிப்பட்டி, பாளையக்காரர் வரலாற்றோடு தொடர்புடைய ஊர் என்பதும், இங்குள்ள பெருமாள் கோவில், பாளையக்காரர்கள் காலத்தில் உருவாகி, அவர்தம் குடியினர் தொடர்ந்து வழிபடும் கோவிலாக உள்ளது என்பதும், இக்கோவிலில் பாளையக்காரர்கள் காலத்து நினைவுக்கல் சிற்பங்கள் வரலாற்றுத் தடயங்களாக இன்னும் காணப்படுகின்றன என்பதும் அறியப்படுகின்றன. இந்தப் பெருமாள் கோவில், இன்றளவும் கோட்டைக்கோவில் என்னும் பெயரால் அழைக்கப்பெறுவதனின்றும், ஆச்சிப்பட்டியில் கோட்டை இருந்துள்ளமை புலப்படுகிறது.

கோவில் பராமரிப்பு

    கோவில், ஆங்கிலேயர் காலத்திலிருந்து சிதைவுற்றுக் கிடந்துள்ளது. அதை ஒருவாறு பேணிப்பாதுகாத்து வந்தவர்கள் கோவிலின் பூசைப் பரம்பரையினரே. பல தலைமுறைகளுக்குப் பின்னர் தற்போது பொள்ளாச்சி போஸ்ட் மாஸ்டர் திரு.ராதாகிருஷ்ணன்  என்பவர் கோவில் பராமரிப்பு பணிகளை மேற்கொண்டுள்ளார்.   

கல்யாண வெங்கடேச பெருமாள் கோவில் முகப்பு

ஆலய பக்கவாட்டில் உள்ள ராமபட்டிணம் ஜமீனின்
முன்னோர் நினைவுக்கல்

கோவிலின் பக்கவாட்டுப் பகுதி

தூரப்பார்வையில் வெங்கடேச பெருமாள் கோவில்

ஆலய கருடக்கம்பம்

ஆச்சிப்பட்டி கோவிலில் உள்ள
திம்மண கவுண்டர் - அம்மண கவுண்டர் சிலைகள்
(16ம் நூற்றாண்டின் முற்பகுதி சிலைகள்)

ஸ்ரீ ராமபிரான் கோவில்:-

ராமப்பட்டிணம் பாளைக்காரர்கள் ஆச்சிப்பட்டியில் இருந்து தங்களது பளையத்தை ராமபட்டிணத்திற்கு மாற்றும் பொழுது தங்கள் வம்சத்தின் இஷ்ட தெய்வமான ராமபிரானுக்கு பாளையக்காரர் சார்பில் இக்கோவில் அழகுற நிர்மாணிக்கப்பட்டது.

ஸ்ரீராமபிரான் கோவில்

தட்டாங்குளம் விநாயகர் கோவில்:-

குமரகுருபர எர்ரப்ப கவுண்டரால் தட்டாங்குளத்தில் (பழைய ஆயக்குடி, பழனி அருகில்) ஜமீனின் நிலத்தில் எழுப்பட்ட இக்கோவிலில் விநாயகர் தனது தாயான பார்வதி தேவியின் மடியில் அமர்ந்து அருள்பாலிப்பது போன்ற சிலை ஒற்றைக்கல்லினால் ஆனது என்பது மிகவும் குறிப்பிடத்தக்கது.

பகவதி அம்மன் கோவில்:-

இக்கோவில் ராமபட்டிணம் பாளைய அரண்மனைக்குள் அமைந்துள்ளது. இக்கோவில் உள்ள பகவதி அம்மனின் சிலாரூபத்தை கேரள மாநிலத்தில் உள்ள பல்லசேனா என்னும் ஊரில் இருந்து எடுத்து வரப்பட்டு இக்கோவிலில் பிரதிஸ்டை செய்ததாகவும், மேலும் பல்லசேனாவில் உள்ள மீன்குளத்து பகவதி அம்மன் கோவில் படிமண்ணை எடுத்துவந்தும் இந்த அரண்மனை பகவதி அம்மன் கோவில் எழுப்பட்டதாக தெரிகிறது. மேலும், அக்காலத்தில் ராமப்பட்டிணம் பாளையத்தின் எல்லை கேரள மாநிலம் பல்லசேனா வரை நிண்டிருந்ததாகவும் கூறப்படுகிறது. 

ராமபட்டினம் அரண்மனை பகவதியம்மன் கோவில்

ஆச்சிப்பட்டி கோட்டை:-

கி.பி.16ம் நூற்றாண்டுக்கு முன்பு வரை ஆச்சிப்பட்டியில் சிறைச்சாலை, கொத்தளங்கள் மற்றும் கல்யாண வெங்கடேச பொருமாள் கோவிலுடன் கூடிய பெரிய கோட்டை ஒன்று ராமப்பட்டிணம் பாளையக்காரர்களின் மூன்னோர் வசமிருந்ததாகவும் கி.பி.16ம் நூற்றிண்டின் முற்பகுதியில் அது முற்றிலும் அழக்கப்பட்டு சிதைந்து போனதாகவும் கூறப்படுகிறது.

ராமபட்டிணம் பாளையத்தின் கோட்டை:-

பாளையக்காரர்கள் முறை ஒழிக்கப்பட்டு பிரிட்டிஷ் அரசால் ஜமீன்தாரி முறை அறிமுகப்படுத்தப்பட்ட காலக்கட்டத்தில் ஆங்கிலேயே அரசு பாளையக்காரர்களுக்கு சில சட்டங்களை விதித்தது. அதன்படி கோட்டைகளை கட்டிக்கொள்ளவோ, வைத்துக்கொள்ளவோ பாளையக்காரர்களுக்கு தடை விதிக்கப்பட்டது. எனவே 400ஆண்டுகளாக இருந்த ராமப்பட்டிணத்தின் கற்கோட்டையை பாளையக்காரர்கள் இடிக்கவேண்டிய கட்டாயத்திற்கு தள்ளப்பட்டனர். இதன் காரணமாக விசாலமாகவும், உறுதித்தன்மையுடனும் எழுப்பட்டிருந்த கற்கோட்டை தரைமட்டமாக்கப்பட்டது.

ராமப்பட்டிணம் அரண்மனை:-

 கோட்டை இடிக்கப்பட்ட பிறகு கி.பி.20ம் நூற்றாண்டின் ஆரம்பத்தில் ஆங்கிலேய அரசின் விதிமுறைக்கு ஏற்றபடி ராமப்பட்டிணத்தின் ஜமீன்தாரால் தங்களது இருப்பிட வசதிக்காகவும், பாளையத்தின் நிர்வாக வசதிக்காகவும் எழுப்பப்பட்ட அரண்மனையாக தற்போதுள்ள ராமப்பட்டிணம் அரண்மனை விளங்குகின்றது. இன்றளவும் அதன் பழமையும், கம்பீரமும் மாறாமல் ஏழிலுடன் காட்சித்தருகிறது.

அரண்மனை புகைப்படங்கள்

ராமப்பட்டிணம் அரண்மனை முகப்பு தோற்றம்

ராமப்பட்டிணம் அரண்மனை நுழைவுவாயில்

அரண்மனை தாழ்வாரம்

ஜமீனுக்கு வரியாக வரும் நெல்மூட்டைகளை சேமித்துவைக்கும்
அரண்மனை நெற்களஞ்சியம்

கதவுடன் கூடய மதில் சுவர்

ராமப்பட்டிணம் ஜமீனின் குதிரை வண்டி

ராமப்பட்டிணம் அரண்மனை நுழைவுவாயில்

அரண்மனை நுழைவு வாயில்

ராமப்பட்டிணம் அரண்மனைக்குள் உள்ள செயற்கை நீரூற்று

ராமப்பட்டிணம் ஜமீன் அரண்மனை:-

பிரிட்டிஸ் ஆட்சிக்காலத்தில் ராமபட்டிணத்தின் கடைசி ஜமீன்தார் திரு. குமரகுருபர ராமநாத மலையாண்டி எர்ரப்ப கவுண்டரால் கி.பி.20ம் நூற்றாண்டில் கட்டப்பட்டதாக இந்த அரண்மனைக் கட்டிடம் விளங்குகின்றது. இவ்வரண்மனைக் கட்டிடம் முதல் கட்டிடத்தை விட சற்றி நவினத்துவமாக மெறுகேற்றி அழகுடையதாக அமைக்கப்பட்டிருக்கின்றது.

2ம் அரண்மனை கட்டிடம் புகைப்படங்கள்

அரண்மனை 2வது கட்டிடம் முகப்பு தோற்றம்

அரண்மனை முகப்பு

உட்புற நுழைவு பகுதி

வரிசையான அறைகள்

அரண்மனை முற்றம்

அரண்மனை பின்புறம்

அரண்மனையின் உட்புறம்

ராமப்பட்டிணம் அரண்மனை வாசல்

அரண்மனை மாடி

அரண்மனையின் முன் பகுதி

ராமப்பட்டிணம் ஜமீன்தார்கள் மற்றும் ஜமீன்தாரிணி புகைப்படங்கள்:-

ஜமீன்தார் ஸ்ரீ நந்தகோபால எர்ரப்ப கவுண்டர்

ஸ்ரீ நந்தகோபால எர்ரப்ப கவுண்டர்
கீழவிரிசையில் இடதுபுறத்தில் இருந்து மூன்றாவது நபர்

ஊத்துகுளி - ராமப்பட்டிணம் - புரவிபாளையம் - சமத்தூர் - மைவாடி ஜமீன்கள்
ஸ்ரீ நந்தகோபால எர்ரப்ப கவுண்டர்
 (இடப்புறத்தில் இருந்து இரண்டாம் நபர்)

நடுவில் ஜமீன்தார் குமரகுருபர எர்ரப்ப கவுண்டர்
ஜமீனின் இடதுபுறத்தில் முன்னாள் காங்கிரஸ் துணைத்தலைவர்
C.P.சுப்பையா முதலியார்

இளம்வயதில் குமரகுருபர ராமநாத எர்ரப்ப கவுண்டர்

 குமரகுருபர எர்ரப்ப கவுண்டர்
(கீழிருந்து 2ம் வரிசையில் இடப்புறத்தில் இருந்து ஆறாவது நபர்

குமரகுருபர எர்ரப்ப கவுண்டர் வேட்டையாடும் போது

குமரகுருபர ராமநாதசுவாமி மலையாண்டி
எர்ரப்ப கவுண்டர்

குமரகுருபர ராமநாத எர்ரப்ப கவுண்டர்

அரண்மனை யானையுடன் ராமபட்டிணத்தின் 
கடைசி ஜமீன்தார் குமரகுருபர ராமநாத
எர்ரப்ப கவுண்டர்

குமரகுருபர ராமநாத எர்ரப்ப கவுண்டர்

ராமபட்டணம் ஜமீன்தார் ஸ்ரீகுமரகுருபர ராமநாத மலையாண்டி
எர்ரப்ப கவுண்டர் (இடமிருந்து 4வது)
அவரது நண்பர்கள் மற்றும் ஆயுதம் தாங்கிய போலீசாருடன்

ராமபட்டணம் ஜமீன்தார்களுக்கு பாதுகாப்பாக
ஆயுதம் தாங்கிய போலீஸ்காரர்களை வைத்திருக்கும்
அந்தஸ்து இருந்தது

ஜமீன்தார் குமரகுருபர ராமநாத எர்ரப்ப கவுண்டரின்
மனைவி ஜமீன்தாரிணி வெங்கடலக்ஷ்மி அம்மாள்

தனது இளைய மகன் தயானந்த ராஜாவுடன்
ஜமீன்தாரிணி வெங்கட லக்ஷ்மி  அம்மாள்

PSG கல்லூரி வாகனத்தின் பின்புறம் நின்றபடி
அனந்தராஜா எர்ரப்ப கவுண்டர்

குமரகுருபர எர்ரப்ப கவுண்டரின் மூத்த மகன்
ஆனந்த ராஜா எர்ரப்ப கவுண்டர்

தனது இளைய மகன் தயானந்த ராஜவை
ஓவியமாக வரைந்த குமரகுருபர எர்ரப்ப கவுண்டர்

ஆசிரியரின் வலப்புறத்தில் மையத்தில் தயானந்தராஜா 

அரண்மனை யானையுடன் ராமப்பட்டிணம்
கடைசி ஜமீன்தாரின் பேத்தி

ராமப்பட்டிணம் ஜமீன் வம்சாவளி திரு. S.K.நந்தகுமார் அவர்கள்

ராமப்பட்டிணம் ஜமீன்தாரியின் அறிய புகைப்படங்கள்:-

தொங்கு விளக்கு

பழைமையான முக்காலி

மான் கொம்பு

மான் கொம்பினால் செய்யப்பட்ட வாள் உறை

வேட்டையாடப்பட்ட மான் கொம்பினால் அலங்கரிக்கப்பட்ட 
குமரகுருபர எர்ரப்ப கவுண்டர் புகைப்படம்

மான்கொம்பினால் செய்யப்பட்ட நாற்காலி

ஜமீன்தாரால் அக்காலத்தில் வேட்டையாடப்பட்ட
யானையின் கால் பகுதி

ஜமீனால் வேட்டையாடப்பட்ட சிறுத்தை தலை

ராமப்பட்டிணம் ஜமீனால் வளர்க்கப்பட்ட யானை

ராமப்பட்டிணம் அரண்மனை யானை

ராமப்பட்டிணம் அரண்மனை யானை

ராமப்பட்டிணம் ஜமீனின் யானைகள்

ஜமீனின் ஹில்மேன் மினிக்ஸ் கார்
(Hillman Minix Car)

மேலத்ணாளங்களுடன் வரவேற்கப்படும் ஜமீன்தார்

ஜமீனின் காருடன் நண்பர்கள் மற்றும் பார்வையாளர்கள்

ஜமீன்தார் எர்ரப்ப கவுண்டருடைய லேண்ட் ரோவ் கார்
(Land rover car)

கைப்பீது:-

ராமப்பட்டிணம் பாளையத்திற்கு கைப்பீது இருப்பதாக கூறப்பட்டாலும் அவை  மெக்கன்சி மேன்யுஸ்கிரிப்ட்ஸின் (Mackenzie Manuscripts) எந்த ஒரு பாகத்தலும் (Volume) இதுவரை வெளிவரவில்லை. T.V.மகாலிங்கம் அவர்கள் தொகுத்து எழுதிய 

Mackenzie Manuscripts - Summaries of the Historical Manuscripts in the Mackenzie Collection: Tamil and Malayalam 

 என்கிற புத்தகத்திலும் கூட Geneological account of Ramapattinam zamindari என்கிற தலைப்பு கொடுக்கப்பட்டிருந்தாலும் கூட அப்பக்கத்தில் கைப்பீது விவரங்கள் ஏதுமில்லாமல் Not Traceable (கண்டுபிடிக்க மஉடியவில்லை) என்கிற பதிலையே தருகின்றது.

இராமப்பட்டிணம் ஜமீன்தார் பற்றிய மாம்பழக்கவி சிங்கநாவலரின் பாடல்கள் (இணைப்புகள் கீழே 👇)

மாம்பழக்கவி சிங்கநாவலர்

* நந்தகோபால எர்ரைய கவுண்டரின் கொடையுள்ளம் - மாம்பழக்கவி 

* நந்தகோபால ஏர்ரைய கவுண்டர் கல்யாண வைபவம் - மாம்பழக்கவி

Photos and informations courtesy

சிறப்பு நன்றி

S.K.நந்தகுமார் BE, MS

(ராமப்பட்டினம் ஜமீன் வம்சாவளி)

நன்றி

காளிதாஸ்  

ராமசந்திரன் 

சத்தியநாராயணன்