பேனர்மேனின் - எட்டயபுரம் செப்பேடு

எட்டயபுரம் அரண்மனையில் பதிக்கப்பட்டுள்ள செப்பேடு:-

எட்டயபுரம் செப்பேடு

வருடம்:-  கி.பி.1779,  ஜனவரி

சாலிவாகன சகாப்தம்:-  சக வருடம் 1700, அஸ்வின மாதம், 28ம் நாள்

செப்பேட்டில் உள்ள மொழி:-  

செப்பேடு முழுவதும் தமிழ் மொழியிலேயே பொறிக்கப்பட்டுள்ளது. இறுதியில் இடம்பெற்றுள் மேஜர் பேனர்மேனின் கையெழுத்து மட்டும் ஆங்கிலத்தில் உள்ளது.

இடம்:-  எட்டயபுரம் அரண்மனைக்கு முன்னதாக உள்ள எட்டீஸ்வரர் கோவில் நுழைவாயிலின் வலதுபுறம் 4 அடி உயரமுள்ள கல்தூண் ஒன்றில் பொருத்தி வைக்கப்பட்டுள்ளது 52x 32 செ.மீ. அளவுள்ள இச்செப்பேட்டின் ஒருபுறம் மட்டும் 33 வரிகளில் வாசகம் உள்ளது.

ஆட்சிக்காலம்:-  ஆங்கிலேய கிழக்கிந்திய கம்பேனி, கும்பினிதுரைகள்.

பொருள்:-  பாளையப்பட்டுகளில் ஆங்கிலேயரின் ஆயுதப்பறிமுதல் குறித்த விளம்பரச் செப்பேடு.

செப்பேட்டின் வரிகள்:-

1. ௲௰௱௯ய௬ ௵ அட்டோபர் ௴ ௳ ௨ய ௳ சகார்த்தம் ௲எ௱க உயக மேல்செல்லா நின்ர சித்தார்த்தி ஸ்ரீ அர்பசி ௴

2. எ உ திருநெல்வேலிச் சீமையுடனே சந்தப் பாளையப்பட்டுச் சீமைகளிலே யிருக்கப்பட்ட பாளையக்காரர்

3. சகலவிதமான குடியானபேர்களுக்கும் தெரியும்படிக்கி விளம்பரம் பண்ணிவிக்கிரது யென்ன வென்றால் மேசர் பா 

4. னர்மென்துரையவர்கள் கும்பினியாரிடத்தில் பெர்ர உத்தரவினாலெ தாகாலத்திலெ கும்பினியார்வர்கள் தி

5. ருநெல்வேலிச் சீமைகளிலே பாளையஞ் சேகரிக்க அகத்தியம் உண்டானதும் பாஞ்சாலங்குரிச்சி யானேழாயிரம்

6. பண்ணையான் நாகலாபுரத்தான் கொலார்பட்டியான் காடல்குடி குளத்தூரானிவர்களனவரும் அஸ்கத்தப் பித்துர்

7. மார்க நடத்தைகளாக நடந்ததினாலே இவர்களுடைய பாளையப்பட்டுக்களைக் கொள்ள நிமர்த்தியம் உண்டானது ம் பாஞ்சாலங்குறிச்சிக் கட்டபெம்மனாயக்கன் அவனுடைய

8. தானாபதி சிவசுப்பிரமணிய பிள்ளை நாகலாபுரத்

9. துப் பாளையக்காரனுக்குத் தமையனாகவும் காரிஷ்தனகாவு மிகுந்த சவுந்தர பாண்டிய நாயக்கனவரகளையு ஸிரச்சேத

10. மாக ஆக்கினை செய்ததும் மேஸர் பனர்மென் துரை யவர்கள் நாகலாபுரம் யேழாயிரம் பண்ணைப் பாளைக்கார ரையுமின்ன

11. தஞ் சிலது முக்கியமாயிருக்கப்பட்ட மனுடர்களையும் அவரவர் பாளையப்பட்டுக்களை நீக்கிவிச்சுச் சென்னைப் பட்டணத்துக்கு

12. அனுப்பிவிக்கிம்படி நிமித்தியம் உண்டானதும் பாளையப் பட்டுகெளிலேயுள்ள கோட்டைகளை யெல்லாமிடித்து அதிலு

13. ள்ள சேர்வைகாறர் சேவகர் குடியான பேர்கள் கைய்யிலுள்ள ஆயுதங்களையும் வாங்கிக் கொள்ள நிமித்தியம் உண்ட

14. ானது மித்தியாதி காரியங்களெல்லா மிதர்கு முன்வகை விபரமாக விளம்பரப்படுத்திய விளம்பரங்களினாலே சகலமா

15. ன பேர்களுக்கும் லோகப் பிரசித்தமாய்த் தெரியப்பட்டிருக்குமே யின்னங் கீழே எழுதப்பட்ட காரிய குணங்

16. களை யெல்லாஞ் சகலமான பேர்களுக்குந் தெரியப் படுத்த வேண்டியது மேசர் பனர்மென்துரையவர்களுக்கு நிமி

17. த்தியமாய்த்தோணி விளம்பரம் பண்விக்கிரது யென்ன வென்றா யினிமேலப்பட்டு யாதாமொரு பாளைய கார 

18. னம் ஷபடி கோட்டை கொத்தள முடையங்கள் போட்டாலும் பீரங்கி ரெக்குலொசா காபிமாரதுகள் வைத்திருந்

19. தாலு , மித் தியாதிகளைச் சம்பாதித்தாலு மவர்கள் கும்பினியாருடைய ஆதரவுகளையுமிழந்து அவர்களுடைய பாளையப்பட்டு

20. களையும் கும்பினியார் கட்டிக் கொண்டு அந்தப்பாளையக்காரனையும் கும்பினியாருக்கு தொணினபடி தேண்டிப்பார்கள்

21. பாளையபட்டுகளிலுள்ள சேர்வைகாரர் சேவுகர் காவல்காரர் குடியான பேர்களிந்தவித மனுடர்களில் யாதாமொரும

22. னுடர்களானாலும் துபாக்கியாகிய கல்வெடி திரிவெடி யீட்டி வல்லயங்கள் பிடித்த பேர்களைக் கண்டாலு மிதுகளை 

23. யொளித்து வைத்திருந்த பேர்களைக் கண்டாலு மவர்களை யுயிர்ச் சேதம் பண்ணுவார்களந்தந்தப் பாளையக்காரர 

24. வர்களுடைய பாளையப்பட்டு குடியானபேர்களுடைய நடத்தைகளுக்கு அந்தந்த பாளையக்காரர் தாமே உத்தரவாதம் பண்ண வே

25. ணும் அதல்லாமலும் யாதாமொரு பாளையகாரனுடைய சனங்களாயுத பாணிகளாய் யெந்தச் சீமைகளிலேயாகிலும் சல்லிய

26. ங்களும் பெலபந்தங்களும் செய்யிரதைக் கண்டாலந்தச் சனங்களுக்கு உயிர்ச்சேதமாகிய தண்டினையும் நடக்கிரதும

27. ல்லாமல்ந்தச் சனங்களுடைய பாளையப்பட்டுப்பாளையக் கார னு டைய சீமைகளையும் கட்டிக் அந்தப்பாளையக்காரன் கொண்டு

28. க் கும்பினியாருக்குத் தோணின 'தண் டினை நடப்பிவிப்பார்களின்ன மரிய வேண்டிய தென்ன மென்றால் மேசர்பனர்

29. மென்துரையவர்கள் பொர உத்தரவுக்காக நடத்திவிச்ச காரியங்களையும் சீமைக்கு சவுக்கியமாகும் படியாய் மேலே

30. ழுதி யிருக்கப்பட்ட சட்டங்களையும் சகலவிதசனங் களுக்குமிப்போதைக்கு மினிமேலென்ரென்ரைக்கும். அரிந்து 

31. மனதிலே வைக்க வெண்டியது மிகவும் யுத்தமாயும். அகத்தியமாயு மிருக்கப்ட்டதான படியினாலே யிந்த விளம்பரத் 

32. தை யொரு செம்புத் தகட்டிலே எழுதி அந்தந்தப் பாளையப்பட்டுத் தலக்கிராமங்களில் பயிர் பலமாயிருக்கப்பட்ட யிடங்களிலே

33. அடிக்கும்படியாய் உதரெவாச்சுது அதுவரியவும் இந்தப்படிக்கி மேசர்பானர்மென் துரையவர்கள் ௳.

- I.A. BANNERMAN MAJOR

செப்பேடு கூறும் செய்தி:-

மேஜர் ஐ.ஏ.பேனர்மேன்

சக வருடம் 1721 (கி.பி.1799 ஆங்கில வருடம்) தமிழ் வருடம் சித்தார்த்தி மாதக்கணக்கு திருநெல்வேலிச் சீமையைச் சார்ந்த பாளையப்பட்டு சீமைகளிலே வாழும் பாளையக்காரர்களுக்கும், அனைத்துவித குடிமக்களுக்கும் தெரிவித்துக் கொள்ளும்படி விளம்பரம் செய்துக்கொள்வது என்னவென்றால் மேஜர் பேனர்மேன்துரை கும்பினி மேலிடத்தில் இருந்துப்பெற்ற உத்தரவின்படி தற்போது திருநெல்வேலி சீமையில் உள்ள பாளையங்களை கட்டாயமாக கையகப்படுத்தும் நோக்கில் பாஞ்சாலங்குறிச்சி, ஏழாயிரம்பண்ணை . நாகலாபுரம், கோலார்பட்டி, காடல்குடி. குளத்தூர் ஆகிய பாளையப்பட்டுகளின் பாளையக்காரர்கள் ஆங்கிலேய கிழக்கிந்திய கம்பனிக்கு எதிராக மேற்கொண்ட கலக நடவடிக்கைகளின் விளைவாக அப்பாளையங்கள் பரிக்கப்பட்டுள்ளது. பாஞ்சாலங்குறிச்சியின் கட்டபொம்ம நாயக்கன், சிவசுப்பிரமண்ய பிள்ளை மற்றும் நாகலாபுரப் பாளையக்காரரின் மருமகன் சௌந்தர பாண்டிய நாயக்கர் அவர்களும் தூக்கிலிட்டப்பட்டு, மேலும் மேஜர் பேனர்மேன் நாகலாபுரம், ஏழாயிரம்பண்ணை பாளையக்காரர்களையும் மற்றும் சில முக்கியஸ்தர்களின் பாளையப்பட்டுக்களை நீக்கிவிட்டு அவைகளை சென்னை அரசோடு இணைத்துக் கொள்ளப்பட வேண்டிய நிர்பந்தம் உண்டானதும். பாளையப்பட்டுக்கிளின் கோட்டையை இடித்துவிட்டு அப்பாளையத்தில் பணியாற்றிவந்த சேர்வைக்காரர்களின் ஆயுதங்களையும், குடிமக்களின் அயுதங்களையும் கையகப்படுத்த வேண்டிய அவசியமும் உண்டானது.

பிறகு நடந்த காரியங்கள் எல்லாம் இதற்கு முன்பாக வெளிடப்பட்ட விளம்பரங்களில் அனைத்து பேர்களும் தெளிவாகப் படித்து உணர்ந்திருப்பீர்கள். இன்னும் கிழே குறிப்பிடப்பட்டிருக்கு விதிமுறைகளை அனைத்து மக்களுக்கும் தெரிவிக்க வேண்டியது மேஜர் பேனர்மேனாகிய எனது கடமை அதன்படி இனிமேல் பாளையக்காரர்கள் யாராவது கோட்டைக் கொத்தளங்கள் அமைத்தாலும், பிரங்கிகள் வைத்திருந்தாலும் அப்பாளையக்காரர் கும்பினியரின் அதரவையும் இழந்து, அவர்களின் பாளையப்பட்டு பறிக்கப்பட்டு, ஆங்கிலேய அரசுக்கு தோன்றியபடி தண்டிக்கப்படுவர். மேலும் பாளையப்பட்டில் உள்ள சேர்வைக்காரர்கள், சேவகர்கள், காவல்காரர்கள் மற்றும் குடிமக்கள் இவர்களில் யாராவது ஆங்கிலேயர்களால் துப்பாக்கி, கல்வெடி, திரிவெடியிட்டு காவலர்களால் பிடிக்கப்பட்டவர்களையும், அவர்களை மறைத்து வைத்து அடைக்கலம் கொடுத்தவர்களையும் அந்தந்த பாளைக்காரர்கள் கொல்லவேண்டும். தங்களின் பாளையக் குடிமக்களின் ஒழுங்கீன நடவடிக்கைகளுக்கு அந்தந்த பாளையக்கார்களே பொறுப்பேற்க வேண்டும். இதுமட்டுமல்லாமல் ஒரு பாளையத்தின் பிரஜைகள் மற்ற பாளையங்களுக்கு சென்று கொள்ளை, கொலை, கலகம் முதலிய செயல்களில் ஈடுப்பட்டால் அத்தகைய நபர்களை பாளைக்காரர்கள் உடனே பிடித்து மரணதண்டனை விதிக்க வேண்டும். அவ்வாறு செய்யத் தவறிய பாளையக்காரரின் பாளையம் பறிக்கப்பட்டு, பிறகு அப்பாளையக்காரரை கும்பினி அதிகாரிகள் தங்களுக்கு தோன்றிய தண்டனைகளைக் கொடுத்து தண்டிப்பார்கள்.  இன்னும் அறிய வேண்டிய தென்னவென்றால் மேஜர் பேனர்மேன் கொடுத்த உத்தவுகளை ஏற்று நடத்தவும், சீமைக்கு நன்மை தரும்படியாகவும் விவரிக்கப்பட்டிருக்கும் இச்சட்டங்களையும், விதிமுறைகளையும்  அனைத்து பேர்களும் இன்றும், என்றும் மதித்து நடக்க வேண்டிய கட்டாயமும், அவசரமும் இருப்பதினால் இந்த செய்திகளை ஒரு செப்பேட்டில் எழுதி அந்தந்த பாளையங்களின் மைய கிராமத்தில் உள்ள பொதுமக்கள் அதிகம் புழங்கும் இடத்தில் பதிக்கவேண்டும். 

அதுவரை, இப்படிக்கு 

- ஐ.ஏ.பேனர்மேன் மேஜர்

குறிப்பு:-

* மன்னர் வீரபாண்டிய கட்டபொம்மன் தூக்கிலிடப்பட்ட 4 நாட்களுக்குப் பின்னர் இச்செப்பேடு எழுதப்பட்டுள்ளது.

உற்றத் தோழன் ஊமைத்துரைக்காக தூக்குமேடை
 ஏறிய மாவீரர்கள் மருதுசகோதரர்கள்

* பேனர்மேனின் ஆணைப்படி அனைத்து பாளையப்பட்டிலும் பதிக்கப்பட்ட இச்செப்பேட்டின் வாயிலாக மன்னர் வீரப்பாண்டிய கட்டபொம்மனின் கிளர்ச்சி ஆங்கிலேய கிழக்கிந்திய கம்பேனியை எந்தளவு பாதித்தது, அச்சமூட்டியது என்பதை நம்மால் உணரமுடியும். பாளையக்காரர்களை பயமுறுத்தி ஒடுக்க நினைத்து இத்தகைய கடுமையான உரைகளைக் கொண்ட செப்பேட்டை வெளியிட்ட கும்பினி அரசுக்கு பின்னாட்களில் மிகுந்த ஏமாற்றங்களே மிஞ்சியது. அதற்கு காரணமானவர்கள் உமைத்துரை, மருதுபாண்டியர்கள், தளி எதிலப்ப நாயக்கர் மற்றும் தீபகற்ப கூட்டமைப்பை உருவாக்கிய வீருப்பாட்சி கோபால நாயக்கர் போன்றவர்கள் தான்.